10 Stupid Questions on Da Air Refresher's Romance (second part)

空氣清新機回答十個好似有關愛情嘅愚蠢問題  Q3-Q5

[如果唔知空氣清新機係乜,可以先睇吓呢個訪問:http://www.musemag.hk/textpattern/winniechau/50/air]

  空氣清新機成員:白只、阿卵、阿雞         interviewer: winnie chau

  訪問日期: 21 Jan 2014

三、假設你係一個女仔,你會覺得你會想要一個點嘅男朋友

winnie:[語氣平靜] 咁,我問第三題喇,好唔好呀?

白:[假裝對 winnie不滿] 搞錯,咁樣同我講嘢。

雞:唔好唔好…. 喂,我好辛苦搵返嚟㗎呢個訪問。[winnie笑,因為明明是她主動建議做這個訪問] 我哋無乜宣傳㗎喇。

卵:咁又係,好,繼續。

winnie:嗱,假設你係一個女仔,都係你自己嘅性格嘅,只不過你係一個女仔-

卵:唉,真係好大鑊。

白:我話畀你聽吖,如果我係一個女仔嘅話-

卵:嘩,真係…

雞:真係好大鑊呀。

白:[強調] 如果我樣貌仲要端好嘅,但係我咁嘅性格嘅話呢,真係食屎呀。

winnie:[] 嗱,咁我問埋先:咁你會覺得,你想要一個咩嘅男朋友呀?

白:唔會想要白只呢類型囉。我諗我會想要… 我想要一個大隻佬嘅。

卵:[] 好肉酸呀… 哎呀好肉酸…

雞:[笑,高聲] 好核突呀!

卵:[] 好肉酸呀,呢條問題真係…

雞:唔係唔係,[向 winnie] 唔關你事,唔關你事。

卵:你諗吓有想像空間,係有啲核突嘅。

雞:一諗到… 你(白只) 講呢樣嘢嘅時候。

白:我需要一個性感嘅男人囉。真係性感喎!即係有 sex appeal 嗰啲嘅男人喎。咁,[停頓,低聲] which is 點解呢啲嘢全部都無,喺我身上面無嘅? [大笑] 哈哈哈,shit!要有啲才華啦。[稍停] 可以 rely on 嘅。咁我女皇嚟㗎啦嘛嗰陣時應該係。

卵:好肉酸。[] 呢條問題,好肉酸呀。[稍停] 真係好肉酸… 呢個問題令到我哋啲想像空間… 諗起就有一種肉酸嘅感覺。

白:我話「大隻佬」嘅時候,我係 picture 到自己隻手-

卵:撟落去?

白:即係被佢緊緊擁抱住 [以動作示範],嗰種感覺。

卵:我幻想到兩舊好大隻嘅人攬埋一舊。

雞:[] 係呀…

白:[不憤]咁我講咗,如果我係一個[樣貌]端好嘅,唔係大隻佬,即係我講緊當我自己係林志玲,okay?

雞:但係我哋唔當你係呀,重點係!

卵:始終都有種好似…

白:想像力弱。用想像力。

卵:唔得呀,我想像力好弱… 始終脫唔開你嘅形象。搞成咁呀林志玲。[半晌後] 好,咁er,我講啦。我係一個女仔,又係我而家自己咁嘅性格吖嘛,係咪呀?咁想[要]一個點樣嘅男人吖嘛。

白:嘩!如果係你呢個性格嘅話,但係… 就算你幾索都好,都幾麻煩㗎喎。[阿卵點頭表示同意] 為咗食物佢可以咁樣喎。即係你做佢男朋友… [稍停,然後低聲] 真係好煩㗎喎。會勁煩。[阿雞大笑] 真係會勁煩囉!

卵:大佬,喂, 炒公仔麵*… []

*訪問前吃晚飯的時候,阿卵因為叫的「牛柳炒公仔麵」變了「牛柳撈公仔麵」而不開心。

白:係嘞!條女就猛咁喺度講… 哎,shit…

卵:咁又係,咁又係,嗰個人真係要咩囉。即係要… 都要幾… 我覺得一定唔可以係我咁樣嘅人啦。即係一定要係好… 我都覺得要係可倚賴的。佢可以幫你… 我嘅性格喎!我解決唔到問題㗎嘛我呢個人根本上係。咁所以,嗰個人一定要係,解決到所有問題嘅人啦。係呀。咁 er,我覺得… 佢可以係,唔叻嘅人嚟嘅。[反問自己] 佢解決到所有問題,點解會唔叻呢?[] 佢解決到所有問題,其實好叻啦。即係佢唔一定要係一個好… smart 嘅人,好有智慧嘅人,反而可能,我覺得最緊要係咩囉,忠直、謹直嘅一個人囉。

雞:「謹直」 。

卵: 謹直,即係-

雞:即係啲筋唔鬆。[阿卵隨即戲謔,模仿他們認為「好緊」的演員]

白:癡線。

卵:[正經] 佢可以係,我覺得唔駛好有… 真係唔駛好有才華。但係通常啲女仔話,啲男人有才華係好吸引㗎嘛,係唔係?

winnie:你問我呀?

卵:唔係,即係通常啲女仔係咁覺得㗎嘛。

白:我諗同得我哋拍拖、同我哋拍過拖嗰啲女仔,全部都係覺得我哋有才華,所以先… 唯一一樣,係因為有才華㗎咋。樣,sorry。幽默感都係一個才華啦,okay?

雞:幽默感係一種技巧。

白:但係你都要言之有物先得㗎。

卵:幽默感係一種社交手段。

雞:幽默感係…

卵:我哋係咪要講返 […]總之[嗰個人]唔好猶疑不決囉。總之我嘅性格,就唔好喺嗰個人身上面發生就得嘞,咁就會好好多嘞。

winnie:咁阿雞?

雞:唔… 我係個女仔呀?我係個女仔… 我想個男仔係…

卵:林志玲咁嘅樣。[阿雞、阿卵、winnie笑]

雞:錯錯地… 林志玲咁嘅樣啦首先要。

卵:但係[你係]女仔嚟㗎喎。

雞:[] [如果我係] 女仔,都係想個男仔好似係林志玲咁嘅樣。[正經] Erm… 我覺得要… 有,佢 (阿卵) 嗰個都啱嘅,即係唔可以同我自己一模一樣嘅。我會…

白:但係其實點解唔可以呢?如果一樣嘅話,咁佢咪會知道你哋 feel緊嗰啲嘢,所以佢咪唔會-

卵:[和阿雞搶著說] 唔係,其實,係。係-

雞:但係你自己嗰個人本身可能係,你係一時一樣嘅,咁嗰條友又一時一樣嘅時候,你真係唔掂檔㗎。 白:但係你會起碼接受到佢,你會-

雞:我接受唔到㗎。

卵:其實,唔係呀,因為嗰件事係,譬如我啱啱咁講,因為我嘅性格咋嘛,如果我決定唔到嘢嘅時候,如果嗰條友都係決定唔到嘢嘅時候,咁大家決定唔到嘢,真係食個飯可能兩個鐘頭都決定唔到去邊度㗎喎。

白:咁但係-

卵:我試過一次,唔係同女仔呀,同一個中學同學,放假喺街度行,喺長洲嗰陣時,但係大家都決定唔到:「食邊間嘢?」… 就真係行咗兩個鐘頭都未去食嘢…

白:但係個結果可能會係,即係好似你話齋,會有啲咁嘅結果出嚟,但係起碼會體諒到對方,譬如如果-

卵:呀咁又會㗎。

白:我唔係呢個性格嘅話,可能避免到呢件時發生[好多次],但係經過十次之後,佢就:「喂!要改啦!可唔可以呀… 乜乜乜…」。咁呀會開始要求對方某一啲位… 但係,如果佢係同你差唔多嘅時候,可能會:「唉我都明嘅 。」好似入面有啲包容。[迅速澄清]我亂咁噏咋,我都唔知呀。

卵:Er唔係,應該都會有呢個情況。

白:即係起碼容易知道對方多[啲啲]囉。

卵:咁我諗呢個世界梗有嘅,唔一定係凹凸嘅,可能凸凸,或者凹凹,都可以一齊嘅,呢個世界都梗有嘅我覺得。

雞:都係嘅。但係同樣地,我同你唔同,但係我都了解你㗎嘛可以。

白:係。

雞:即係你嘅 talent,可能係,你睇到人㗎嘛,咁嗰個係好勁嘅。如果我係女嘅話,我係想咁樣樣㗎。

卵:點樣呀?

雞:即係我想個男人係睇得到啲嘢。

白:睇得到啲咩啫?[三人起哄]

雞:睇穿自己呀。

卵:你講緊陰陽眼嗰啲呀?

雞:睇穿自己呀。

白:睇穿自己呀?

雞:睇穿自己,但係唔出聲嗰啲囉。

白:[同時] wooooooooooooow!

卵:[同時] wooooooooooooow!你好適合去日本。

雞:去日本做咩呀?

白:點解呀?

卵:日本啲女係唔出聲㗎嘛。

白:係咩?

雞:係咩?

卵:係呀,日本啲女仔唔出聲㗎嘛,收埋收埋㗎嘛,等人哋照顧咋嘛。[三人繼續此討論] […]

雞:佢睇穿你,嗰個唔係咩嘢特別技能。

卵:特別技能嚟㗎,唔係好多人可以睇穿人。我而家都睇唔穿你,你而家後面嗰啲嘢我睇唔到㗎。[忍不住笑]

雞:係吖。咁唔係講緊你睇到我後面嘅嘢吖嘛。

白:佢唔係講緊 visual 呀! […]

雞:我覺得個男人要… 要有格嘅。

卵:「有格」?

雞:即係唔係嗰種,唔係你 (白只) 嗰種-

卵:賤格?

雞:sexual… 唔係嗰個嚟嘅。

卵:有格… 咁你覺得自己算唔算有格吖?

雞:我唔係好算有格。

卵:但係有啲嘅?

雞:有少少,但是你 (阿卵) 係有格㗎嘛。

卵:我有格?我啲低下階層藍領格?

雞:你唔會吖!啲人幾鍾意你先得㗎。

卵:[靜默兩秒] 又係嘅。

雞:即係有一種特性… 唔普通啦,簡單嚟講。

winnie:即係有性格呀?

雞:有性格嘅,有一種 character嘅。

卵:你無 character 咩?

雞:我有,每個人都有character。但是而家講緊我係女-

卵:佢(白只) 最有character。

雞:係㗎,如果我係女,可能… 呀唔會嘅都,好難。代入唔到,sorry。[]

[各人繼續這對話四分鐘,由於篇幅太長,未能盡錄]

四、你最鍾意嘅愛情故事,係邊個?

winnie:你最鍾意嘅愛情故事,係邊個?

雞:[兩秒後] 我鍾意有一個叫做 er…《The Notebook》… [向白只確定電影名字] 係咪呀?

白:係!

雞:講嗰條友,一開始喺個護老院嗰度呢,個男人每一日都係探嗰個女人-

卵:哦,失憶嗰個呀?

雞:係呀,失憶嗰個。我鍾意呢個愛情故仔。跟住,講返[個男人]後生嗰時點樣識[個女人]。佢係點樣溝佢呢:擒咗上去個摩天輪度,單手,「你同唔同我一齊食飯?你同唔同我一齊食飯?我放手㗎喇!」咁囉。

卵:真係監粗嚟。

雞:監粗嚟。[] 如我鍾意嗰種監粗嚟。

白:[高聲強調] 而得喎!而 work喎!

雞: 但係你諗吓,呢個世界唔會㗎嘛![語氣冷漠]「咪死囉,肥仔」[模仿從摩天輪掉下來的叫聲] 就跌咗落去。

白:我鍾意嗰個愛情故仔係,劉若英同埋陳昇嗰個故仔。

winnie:係真人[真事]?

白:真人[真事]。

winnie:可唔可以講少少係點㗎?

白:網上面有好多個版本嘅,但係我剩係 base on 一個就係佢哋兩個做一個節目,就係訪問阿劉若英。劉若英要喺… 台灣開第一次小巨蛋演唱會。咁然之後呢,就搵咗陳昇嚟做佢嘅嘉賓。即係要訪問劉若英,咁劉若英就帶咗個嘉賓去,咁就嗌陳昇。陳昇就係劉若英嘅師父。咁就 係,好似係,感覺上面,喺嗰個訪談裡面,係有啲曖昧喺度嘅,即係都極度曖昧㗎喇。咁就係類似… 我嘅 interpretation就係,劉若英係-好-愛-阿陳昇。但係陳昇就係,好似都有愛喺度嘅,但係,佢已經結咗婚㗎喇。咁我只係你師父嚟嘅啫,嗰種, 有少少相敬如賓,即係有種互相尊重喺入面,但係又入面有種幾濃嘅愛。

winnie:但係而家有無一齊㗎?

白:無呀,佢哋無一齊到好似。都幾年前㗎喇,嗰個訪問。

winnie:阿卵呢?

卵:《無痛失戀》(Eternal Sunshine of the Spotless Mind)嗰個故事。

雞:我都仲未睇,喺屋企…

白:《無痛失戀》未睇?有一年嘅 best movie 呀。 卵:你 [向 winnie] 有無睇過《無痛失戀》?

winnie:有呀。

白: [] 「And everybody’s gotta learn sometimes…」

五、點解啲人會覺得夾 band 嘅男仔會多女仔鍾意?

winnie:點解啲人會覺得夾 band 嘅男仔會多女仔鍾意?

卵:[] 我唔覺嘅,係啲人覺咋喎。

雞:我唔覺嘅。

卵:[強調] 但係我唔覺嘅?

winnie:[] 咁你覺得啲人點解咁樣覺得?

卵:「啲人咁樣覺得」呀?係咪真係有人咁樣覺得㗎?我都唔知係咪係有人咁樣覺得。

白:有人咁樣覺得㗎。

卵:夾 band 嘅男仔多人鍾意?呢個係事實,定係有人-

白:唔係事實-

卵:「覺得」,定係事實嚟㗎?

白:你哋繼續講,我摷啲嘢畀你哋睇,係關於呢一樣嘢嘅。

卵:你點解會做咗資料搜集嘅? [白只在 iPad 搜索著] […]

白:[見各人不語,敲桌子] 喂!繼續講啦!

卵:等緊你篇嘢吖嘛!

白:[不耐煩] 搵緊呀我,等咩啫?

卵:即係我覺得「點解其他啲人會覺得band 嘅男仔吸引啲」?

winnie:係呀。

卵:會多女仔鍾意?

winnie:係呀。

卵:[稍停] 我諗可能係… 咩啩,即係,首先夾 band 嘅男仔同一個單純唱歌嘅男仔,唔同嘅地方係,夾 band呢樣嘢個感覺係一種… 顯示佢自我嘅感覺多啲囉。即係單純唱歌,一個歌手… 可能啲歌係人哋作,佢只係純粹演繹嗰首歌。但係夾 band係自己創作,通常 band 都係啦,咁係佢哋自己嘅嘢,去投放佢哋自己… 會有一種… 我見到呢個人吖嘛。咁其實可能,呢樣嘢係有關係。[…] 而且呢一樣嘢係一種表演緊嘅嘢。即係係一種… 你都可以話,係一種鎂光燈下嘅一種-

白:你而家要睇我嘅 reference。[向阿雞展示]

雞:我畀你睇㗎呢個。

白:你畀我睇㗎咩?

雞:我畀你睇㗎。

卵:[看了圖片,笑,然後拍掌,大叫] It’s REAL! [三人討論圖片裡那一項最能反映實況] […]

白:如果呢幅圖有 50% 正確嘅話:阿雞係結他佬嚟嘅,再加 vocals ,咁一、二、三、四、五、六,減一半,50%,都有三個。咁阿卵就分得一半,半個女人。我呢-

winnie:半個人-

雞:半個人,你剩返自己-

卵:自己空虛咗一半-

白:上半身,或者左半身。

[接著六分鐘的對話內容不便公開]

 

 

 

the unspoken

© 2020 by winnie chau