10 Stupid Questions on Da Air Refresher's Romance (third part)

空氣清新機回答十個好似有關愛情嘅愚蠢問題  Q6 &Q7

 [如果唔知空氣清新機係乜,可以先睇吓呢個訪問:http://www.musemag.hk/textpattern/winniechau/50/air]

  空氣清新機成員:白只、阿卵、阿雞         interviewer: winnie chau

  訪問日期: 21 Jan 2014

六、你覺得點樣嘅女仔適合另外嗰兩個成員?

winnie:你覺得點樣嘅女仔適合另外嗰兩個成員?唔駛講具體一個人,而係形容一吓,點嘅女仔會適合對方。

卵:[即時向白只] 你想要咩人吖?

winnie:[] 你直接問佢?

卵:[向白只] 你想要邊個吖?

雞:佢應該… 我哋應該知㗎。我哋一定有 reference 嘅。[除了白只,眾笑]

卵:唔係覺得適唔適合佢呀,係純粹知道佢喜好啫。

雞:係,知佢喜好啫。可能都適合佢嘅。[…] Erm… 佢適合啲咩人呀?

winnie:或者咩女仔適合佢。

雞:唔好咁煩嗰啲囉,我估。即係… 知道佢諗咩嗰啲人,不過好難嘅其實係,好難㗎。

白:有無人適合我?你哋知嘅人有無,除咗[我嘅前度女友]曉怡之外?有無人你哋覺得:吖,佢可能同白只可能 okay?有無啲女介紹吓?[winnie、阿卵笑]

卵:但係我有啲感覺係,嗰個人可能係,我覺得… 有時係要,要爆吓你嘅。[白只微笑] 即係嗰個人係-

雞:要懲治吓佢。

卵:唔係-

雞:要 dictate 到佢嘅。

卵:要突然間有種激情嘅,即係嗰個人,我覺得,對你(白只)係需要有種激情喺度。即係我覺得你都係想,somehow 你嘅心底入面都係想有嗰種激情。

白:呢個 I have no comment。

雞:被征服。

卵:我覺得… [強調]我覺得咋嘛![稍停] 我覺得你係需要被征服㗎。你係一匹野馬。[阿雞笑] 你係一匹赤兔,你需要一個呂布。[阿雞、白只大笑] 騎住你。 […]

卵:但係嗰個女人一定要好有吸引… 即係要好有魅力嘅,如果唔係佢唔「鋸」嘅-

雞:嗱,應該係要嗰啲… 即係北京嗰啲呢,即係-

卵:嘩!上海婆?

雞:唔係上海婆嘅,都唔係山東。即係嗰種… 有一種氣質,但係… 佢(嗰個女人)要爆嘅時候,佢唔駛用力嗰啲爆嘅。[阿卵表示同意] [好似]嗰啲咩四姨太嗰啲 character 呢-

白:[模擬自己對著那女人的反應] 「唉,好喇好喇,聽你講,你話啦,唉!」

雞:佢(嗰個女人)無出過聲㗎,但係佢(白只)會聽到,然之後自己會答咗人哋。即係頭先嗰句說話人哋無講過嘅。

白:[似乎欣然承認] okay。

雞:可能個姨太著住旗袍坐喺屋企門口嗰度,咁佢(白只)返到嚟,踩完單車,咁佢(白只)就知道會做咩㗎喇。

卵:同埋佢(嗰個女人)一定要著旗袍㗎其實,[winnie笑] 唔著旗袍,爆唔到你(白只)。即係,你會唔「鋸」。

白:我係好鍾意啲女人著旗袍。

卵:係吖,我覺得係吖。即係有嗰種… 媚態,即係有種… 古典美呀。

雞:有種古典美喺度,係呀。

卵:你就「鋸」喇,你就會「鋸」喇。即係你都會反抗嘅表面,但係應該會「鋸」。我覺得啫,係嘞。

雞:征服到佢(白只) 嘅。

卵:征服到佢(白只) 嘅。但係如果佢(嗰個女人) 著返啲現代人嘅衫呢,應該你(白只)就覺得[模擬白只不憤的反應]:「做乜爆我呀?」[] 但係一著旗袍嘅時候,你做會「林」喇應該。

雞:古裝人。

卵:古裝![笑] 著古裝你就會「林」喇。《大宅門》嗰啲呀。

雞:係呀,《大宅門》嗰啲。

白:我覺得阿雞應該要搵個… 如果我去配偶嘅話,我就會介紹-

卵:配種幫佢。

白:林志玲畀佢識。

卵:幫佢配種。

雞:幾時呀?[]

白:[認真] 即係如果我有機會認識嘅話,我會介紹啲真係好索嗰啲畀佢囉,先至 deserve 到佢。

雞:都唔係嘅,咁嗰個唔係最適合我嘅我估都。

白:但係總之我盡可能介紹就介紹啲索嘅畀你啦。

雞:Thank you。[向阿卵] 咁你呢?

卵:你嘅喜好,都係鍾意啲…

雞:呀係, 你好似會了解我多啲。

卵:啲… 少少「懶」可愛嗰啲㗎。

雞:你唔了解我喇你。

卵:你鍾意溝嗰啲女。

雞:乜嘢呀?即係你講邊啲呀?

卵:「懶」小鳥依人嗰啲呀。 雞:「懶」呀? 卵:其實我覺得大部份都係「懶」㗎咋。其實香港嘅女仔有邊個真係小鳥依人吖?唔好玩啦。

雞:咪就係。

卵:但係我知道,你一定唔可以係同啲好悶嘅人一齊。

雞:oh yea,that’s right,that’s right。[稍停] that’s right。

卵:我諗… 其實你-

雞:即係,嗱如果好似-

卵:你應該… 其實你都需要,我覺得-

雞:如果林志玲係好悶嘅話,我都應該有啲驚。

白:係!但係… 喺我嘅角度裡面嚟講,就算佢悶同唔悶,總之,first priority:got to be hot。

卵:yea。我覺得你一定要啲靚嘅女仔。

白:係。

雞:都唔…

白:即係首先要入咗一個位係可以… 可以有電話先啦。但係喺個 group 度-

雞:咩有電話?

白:即係意思話,佢(個女仔)喺個 list 度,佢終於入到閘喇,入完閘之後,你去揀呢啲佳麗嘅時候呢,就要個個都係咁嘅質素,你又唔會再講嗰個質素,你就會講內在嘞,真係相處嘞。相處,你係比較麻煩啲嘅。[阿卵點頭認同]

雞:哦,erm,okay。[]

白:因為你始終,你都係要相處,你都有嗰種… 嗰種嘢喺度先得。

卵:同埋,我諗你都… 一定唔鍾意人哋煩你㗎啦。即係,你咁嚮往自由。

雞:唔… 睇吓咩叫做「煩」啦。

卵:即係佢… 唔會多過問你,即係佢唔需要刻意佢過問你嘅嘢啦,我覺得。

雞:[猶疑] 唔…

卵:即係你話畀佢聽你喺邊度,就喺邊度。即係唔駛… 即係總之你自主啲嘅。

雞:呀咁樣好似好啲。咁樣好似啱啲。

卵:即係嗰個人都自主啲嘅其實。

雞:係,係。

卵:即係對你嚟講,個關係係,有個空間喺度嘅-

雞:係,係。平等啲嘅。

卵:係嘞。

雞:係呀。大家都 even 啲嘅,無話邊個多啲。[…] 阿卵呢?我覺得阿卵適合嗰啲,er,再 weak 啲嘅女仔囉。

卵:其實未必係適合,[停頓] 但係喜好。

雞:唔係,你會提升咗你嗰個… 自理能力嘅。即係,你會… 處理多啲… 即係你會無而家嗰種「決定唔到嗰樣嘢」嗰個 character。即係你會… 突然之間 be like a man。

卵:我唔知係咪。

雞:即係我覺得係會,會有幫助囉。即係對你嗰個… career。

卵:唔知呢。係啩。

雞:I don’t know。

卵:我都唔知。

雞:我都唔知。但係我執幾個畀你。

卵:好。[原本一直在練習 bass 的白只笑]

雞:喺東涌呢,有幾個小朋友 [] […]

白:我會覺的阿卵係… 我會介紹… 我唔用外表去介紹,就唔同阿雞。因為阿雞嗰啲同阿卵… 阿卵係估唔到嘅,即係我估唔到佢鍾意邊一類,或者邊type 嘅,即係樣貌上面。所以外表嗰個 factor 呢,我就估唔到。咁但係,性格上面呢,我會介紹一啲小鳥依人嗰啲畀佢,係。即係雖然佢心裡面知道香港度無小鳥依人嘅女仔。但係,如果有啲識得扮小鳥依人嗰 啲呢,我會介紹啲小鳥依人畀阿卵嘅,因為我覺得阿卵其實,佢係都… 佢都會照顧人嘅,係呀。[阿卵]都鍾意啲佢鍾意嘅女仔-

:畀佢照顧囉。

白:[畀]佢照顧囉,係囉。即係,佢會想照顧啲佢鍾意嗰啲女仔囉。但係… 覺得係啲小鳥依人啲嘅女仔,對於佢嚟講,係有啲嘢嘅。

winnie:唔。

白:係呀。 [靜默半晌,當 winnie 準備問下一題的時候]

卵:yea。

winnie:咁… 你哋…

白:所以我會介紹… 真係要諗吓先得呀,因為真係無乜… 即係無乜人係小鳥依人喺香港都,所以…

卵:所以我唔應該喺香港嗰度… 發展。

白:係呀。

雞:係,可能係。

白:其實-

雞:但係林志玲都唔係香港人嚟㗎。

卵:雲南囉。

白:但係… 我鍾意柏安妮呀,我鍾意鍾楚虹呀,我都鍾意呀。[向 winnie] 知唔知邊個柏安妮呀?

winnie:知知地。

白:she is really hot。

卵:舒拉寶娃呀。

白:she is very very hot。

雞:[回應阿卵,沒有理會白只] 舒拉寶娃。

白:不過愛情已經唔再重要喇。

七、你哋對女仔 (或者女人) 嘅最大一個疑問係乜嘢?

winnie:你哋對女仔,或者女人,嘅最大一個疑問係乜嘢?即係你最唔明[佢哋嘅一樣嘢]。[各人靜默十五秒後]

雞:我無唔明㗎。

卵:佢(阿雞)係女性嘅專家嚟㗎。

雞:唔係。嗰個係… 我接受咗。即係:馬騮點解會多毛呢?[] 嗰個… 即係,你明唔明呀…[] 嗰個唔係明唔明嘅問題… 嗰個係… 特質嚟㗎嘛。

卵:其實都有類似[嘅諗法]。即係有啲嘢我覺得:算啦無得明嘅。

雞:係呀-

卵:因為[同阿雞]一樣㗎,我有少少覺得係,都唔會明。即係一定係有一啲[停頓]角度嘅唔同喺度-

雞:[搶著說] 最簡單係,唔同嘅生物嚟㗎嘛。即係… 大家嗰個… 嗰啲叫做咩呀?即係個特徵呀… 個構造,係,個「構造」唔同㗎嘛。

白:[本來在練習bass的他,忽然]會唔明嘅就係,點解佢哋而家呢個世紀… 我會唔明啲女仔點解仲會覺得,係要男仔追女仔囉。唔會主動囉。即係好似我啱啱話,如果我係女仔── 當然林志玲係極端得滯啦,但係如果我係一個女仔嘅話,唔駛要林志玲咁勁,咁靚,咁極端,但係我會覺得,我諗我會 experience 多啲愛情,或者勇敢啲。我就會唔明點解而家:「人哋係女仔嚟㗎嘛,點會咩咩咩咩…」我唔明點解唔夠膽囉。即係,應該有啲原因嘅,但係覺得,個世界變緊喇, 如果真係愛情係咁緊要嘅話,咁其實女仔做主動都唔係一個問題嚟㗎喎。同埋女仔做主動,成功率係高好多,硬係覺得。係咪,你哋覺唔覺得呀?

卵: 咩呀,「男追女隔重山,女追男隔層紗」吖嘛,以前啲人咁講…

白:我係覺得嘅。如果… 遇著啲好嘅男仔啦,無論佢成唔成為男朋友都好,佢係會尊重你,佢就算唔夠膽講:「我唔鍾意你呀」 、「我對你無感覺」,或者唔夠膽同你講分手,或者咩都好。其實女仔係可以… 即係爽朗嘅女仔,或者我覺得女仔係可以做啲好快嘅決定,可以好容易係做到一啲嘢㗎喇。即係:「你唔鍾意我,唔緊要,我鍾意你咋嘛」,或者「我同你講分手, 我而家唔鍾意你喇,唔好咁啦,無用㗎喇 […] 無,我無鍾意第二個,但係我就係唔鍾意你囉,就係咁簡單。」但係男仔呢,會搞到呢,好似… 好拖拖拉拉咁嗰啲之類。

卵:猶疑不決,喺呢啲時候。

白:男仔好似會多咗啲[強調] 不必要嘅猶疑不決。

雞:要考慮囉…

卵:我,以前我會唔明嘅,以前我成日都唔明一樣嘢,就係:即係譬如女孩子呢,會… 佢會,佢講緊嗰樣嘢呢,其實佢唔係想講嗰樣嘢㗎。

白:[反應很大] 係啦!估極佢都估唔到乜嘢意思呀!

雞:呀,呢個係喎。

卵: 即係佢-

白:[帶點氣憤] 又唔肯講,原來你講呢樣嘢呀?!

卵: 即係發生一件事呢,有時你唔明:「你做咩咁激動呢?」即係嗰樣嘢係啲咩啫?唔係一啲重要嘅嘢㗎,但係點解呢樣嘢會牽動到你。原來其實因為,係之前有一啲, 另外一啲,事情,佢係會有一種,將啲嘢呢,好似… blur 埋一齊,影響佢嘅諗法㗎。所以以前成日都唔明,「吓,其實原來你覺得係咁樣」但係其實唔關嗰件事[嘅]事。[…] 但係好似佢(阿雞)咁講,馬騮多毛,無得解㗎,咁樣囉。但係男人係唔會。嗰啲嘢發生咗,或者決定咗係咁樣嘅時候,咁咪,就決定咗係咁樣囉,就唔會再攞出嚟講㗎喇,因為係決定 咗咁樣㗎啦嘛。咁佢唔會再將嗰啲嘢燒埋其他嘢一齊[嚟] 講㗎嘛。[…] 譬如,兩個人做咗一個決定,其實可能個女孩子係唔鍾意呢個決定㗎喎,咁但係因為你鍾意,你想咁樣,佢就決定咁樣做-

白:「你-鍾-意-啦-」[重複這句說話,又以普通話說出]

卵:「唉,你鍾意啦!」呢一樣成日都會出現。[與白只同時以同一節奏說出]「你鍾意啦!」係呀,但係其實佢… 唔想㗎喎,因為佢就咗你吖嘛。[…] 我哋去做咗呢件事嘞,咁但係做呢件事,佢個心係唔「鋸」㗎喎,一路都係唔「鋸」㗎喎。[…] 喺做呢件事當中再有少少嘢發生嘅時候呢,就會牽引埋呢一樣嘢,而導致佢情緒可能激動呀,變化呀。[…] 因為男人就係針對一件事咁睇咋嘛,好多時候;女孩子可能係針對成套配套咁睇㗎嘛,好多時候。[…]因為女孩子,係多男孩子一條… 嗰啲咩呀… 染色體吖嘛。所以女人應該係聰明過男人。女人叻過男人係正常嘅我覺得。即係佢諗啲嘢其實諗得仲大過啲男人,個世界仲濶-

白:我都某程度上[覺得]。

卵:所以其實有啲嘢你睇唔到,你唔明㗎。係蠢嘅,即係男人有少少蠢嘅。嗰個蠢就係:你就係諗[一]樣嘢吖嘛,一齊對住[一件事],你就剩係諗住[一]樣嘢,女仔可能諗緊嘅其實係其他更多嘅嘢。

雞:諗得多啲囉-

卵:女孩子可能真係比男孩子聰明啲-

雞:有條理啲囉。你諗吓,做SM (stage management) 嗰啲大部份都係女人嚟嘅。即係最頭頭是道嗰啲都係女人嚟嘅。[…]

卵:所以我啱啱講嗰樣嘢,唔係喺度… 覺得:「啲女仔真係怪」,唔係。我係覺得可能我哋有啲嘢,我哋係會成日忽略,或者無留意,但係女孩子係會留意嗰一啲我哋忽略嘅嘢。

 

 

Go To: 10 Stupid Questions on Da Air Refresher's Romance (last part)

the unspoken

© 2020 by winnie chau