10 Stupid Questions on Da Air Refresher's Romance (last part)

空氣清新機回答十個好似有關愛情嘅愚蠢問題  Q8-Q10

 [如果唔知空氣清新機係乜,可以先睇吓呢個訪問:http://www.musemag.hk/textpattern/winniechau/50/air]

  空氣清新機成員:白只、阿卵、阿雞         interviewer: winnie chau

  訪問日期: 21 Jan 2014

八(a)、白只,如果你嘅女朋友唔想你玩音樂,你會點呀?

winnie:白只-

白:係!

winnie:如果你嘅女朋友唔想你玩音樂,你會點呀?

白:[從包裝袋,一顆接一顆取出魚仔餅,吃著] 有一個女仔 [停頓] 無可能、無可能。

winnie:無可能呀?

白:無可能。如果我女朋友-

雞:唔想你玩音樂。

白:唔想我玩音樂。

雞:佢應該唔會係佢女朋友先啦。

卵:係。我都覺得係。

雞:肯定唔會啦。

白:即係無乜可能,係咪先?即係無乜可能喎,我哋咁鍾意[音樂]。[稍停,強調]不過 in case,即係類似:「唔好咁玩呀… 即係,要結婚喇,要咩咩咩… 你可唔可以玩少啲,或者用另一個方法玩」。咁樣可以 compromise。但係如果佢覺得…

 

卵:佢純粹討厭音樂,佢唔想你玩,純粹討厭音樂。

雞:無呀,無可能。

卵:咁所以就應該唔會咁樣。

白:真係無可能。或者佢唔 appreciate 我玩緊嗰啲音樂呢,即係我唔駛佢做我fan屎囉──梗係有一個盲目嘅支持者係好啦── 就算佢唔係,咁,都希望唔好覺得… 即係唔鍾意囉。或者唔 respect 呢種… 我哋玩緊嘅音樂囉。[仍然吃著魚仔餅] 都幾慘㗎大佬-

雞:嘩好慘呀!

白:如果佢真係返到嚟,即係譬如[我問佢]:「啱啱彈成點呀?」[佢答:]「唔係呀嘛,彈成咁。」

雞:唔係呀,[佢]唔問呀。

白:「好唔好睇呀?」「okay 啦。」

卵:「okay 。」

白:我都無fan屎嘅。自己女朋友都唔係fan屎,死唔死?[winnie 笑,大概是笑白只吃著魚仔餅的樣子,而不是他的話] 真係喎。好慘㗎喎。

八(b)、阿卵,如果你女朋友唔畀你打機,你會點呀?

winnie:咁阿卵,如果你女朋友唔畀你打機-[阿雞大笑]

白:唔畀咩話?

winnie:「唔畀你打機」。

雞:嘩好大鑊呀,呢個重要啲呀!

winnie:[強調] 係「唔畀」喎。

卵:因為打機對我嚟講重要過音樂嘅 [語氣平淡,分辨不到這句是 statement,還是 question]

winnie:係… [大笑] 唔知呀。

卵:唔畀我打機呀?唔…

雞:[模仿阿卵,語氣堅決]「我今晚要打一舖機!」。嘩好慘喎。

卵:真係都幾慘。

雞:但我懷疑你係得㗎喎。

卵:但其實真係唔係唔得嘅。

雞:佢係得嘅。

白:我都覺得係。

卵:其實唔係真係唔得。

白:你得。

卵:打機對於我嚟講係一種-

白:你過唔到嗰關,係佢提出咁嘅要求呀-

卵:係呀。

白:但係佢叫你做,即係:「今晚唔打機得唔得?」「得!無所謂。」但係如果佢係覺得你打機係好有問題,你唔可以打機,咁就真係唔同啲喇。

卵:Er… 我會手痕㗎,我會成日都想打㗎。因為對我嚟講[打機]好似我而家食緊煙一樣,即係一種…

白:癮?

卵:癮呀。或者係一種…

白:relax 嗰啲?

卵:習慣,或者 relax,或者係一種:我有個 moment 我要打機,洗腦,唔諗嘢。或者個腦係要有一個咁嘅時段喺度。即係有一種咁嘅習慣喺度嘅。但係咪戒唔到呢個習慣呢?唔係,即係可能係好似食煙咁樣,係有機會戒到嘅嘢嚟嘅。即係唔係完全無可能嘅。

白:但係唔玩真係無乜可能。

雞:唔當住佢面玩。

白:咁又係。

卵:因為嗰樣嘢,事實上唔係一樣咁… 當然係會想玩啦。我可能亦都會同食煙一樣啦,即係佢唔畀我玩,[輕聲請求]「一舖一舖」[] 「囈」佢,可能我都會咁一樣「囈」 佢嘅。但係如果真係一個好 serious 嘅問題… 一個好決定性,critical 嘅原因,係有可能會,可以唔玩,但係[就要]睇吓佢嗰個出發點係點樣囉。[稍停] 佢係為我好嘅,你亦都知道佢係為你好嘅-

白:[] 「為你鍾情」

卵:咁你唔會介意。即係大家可以拗吓數啦當然。咁但係,如果佢嗰個出發點係純粹唔「鋸」你打機啫,即係嗰樣嘢係,唔係經過一個尊重嘅情況低下,純粹佢自己個人喜好嚟嘅。咁我就會覺得… 有啲問題嘞。咁但係如果佢係,有原因地咁樣去做嘅話,咁我唔會介意囉。

白:[忽然回答之前問題]佢叫我唔做戲,可能得呀。我無所謂。

winnie:我就係知道你無所謂,所以唔會咁問你。[]

白:音樂真係… 同佢 (阿卵) [對]打機嘅程度真係… 都幾緊要。

[…]

八(c)、阿雞,如果你女朋友係討厭小朋友同埋小動物,你會點呀?

winnie:咁阿雞,如果你女朋友係,討厭小朋友同埋小動物嘅-

雞:[一直練習結他的他,迅速] 唔得呀。

卵:「討厭」,喂,其實一個討厭小朋友、小動物嘅女仔,其實都幾恐怖。

雞:[在阿卵正回答時,重複] 唔得。唔得。唔得。

白:唔係喎,但係… 而家有幾多女孩子係,佢可能未去到討厭嘅,但係,佢唔喜歡小朋友,唔喜歡有家庭,唔駛諗住-

卵:唔係,佢「唔喜歡」,同「討厭」係兩回事嚟㗎喎。

雞:嗱!即係我… 唔覺得要生嘅,但係,你唔可以討厭囉。無可能嘅。

卵:即係其實嗰件事係… 即係好簡單咋嘛,可能佢對小朋友,或者小動物無乜特別,通常我哋心入面嘅女孩子都係好可愛㗎嘛。即係佢見到小朋友都會,即係通常人都係㗎嘛,見到小朋友:「嘩好得意呀!」

白:如果一個虐待… 虐畜嘅-

雞:死硬。

卵:你都會虐待佢。

雞:我會虐待佢。You hurt her,I hurt you。

白:嘩!

卵:嘩!

雞:I don’t mind get back to jail。[]

卵:但係,真係好難,我覺得有少少難。「討厭」真係有啲難。

雞:係呀。

白:但係你好鍾意佢,佢又唔影響你任何嘢,你自己又無小朋友喎。咁只不過盡量唔好行過嗰啲… 即係盡量唔好去迪士尼囉。唔好見到嗰啲小朋友囉。

卵:佢… 見到幼稚園要避呀。

白:係囉。即係住嗰條街係唔可以有幼稚園喺度。一見到有嗰啲 yellow bus 就會發爛渣呀-

卵:踢垃圾桶。[]

白:[演繹設計對白]「唔食呀!」「發咩脾氣?」「你見唔到㗎咩?-

卵:嘩,都幾變態呀。

雞:好變態。

白:兜口兜面咁樣行過」

[阿雞繼續練習結他]

九、如果你被困喺一個災難,你知道無生還機會,你只可以用你嘅手提電話打畀一個人,你會打畀邊個?會講啲乜?

winnie:咁跟住… 又係假設嘅問題嚟嘅… 嗱唔一定係[同]愛情[有關],touch wood 如果你被困喺一個災難裡面啦-

白:啊!

winnie:例如地震,或者火災… 沉船嗰啲。你知道都可能無乜機會生還㗎喇-

白:Oh shit!

winnie:你只可以用你嘅手提電話,打畀一個人,咁你會打畀邊個,同埋會講啲咩?

[…]

雞:打畀屋企人。

卵:可能我會打畀我老豆。

雞:我唔會打畀我阿媽,因為我阿媽個電話呢就… 佢唔係攞嚟打[電話]嘅,佢攞嚟打機嘅。

卵:我都唔會打畀我阿媽,因為我阿媽講電話嘅節奏太慢喇,我諗我講唔到幾多嘢。[Winnie 笑,阿卵白只也跟著笑] 同埋佢好似十句嘢[…]有五句都聽唔到我講啲咩嘅。

白:我估我會打畀… er,我估我會打畀我老豆囉。咁都係講吓我而家發生咩事呀,要照顧邊個,幫我話畀媽媽聽咩咩咩呀… 家姐呀嗰啲呀。我估係屋企人囉。女朋友就… 就算我同曉怡拍拖嘅話… 如果我同曉怡拍拖嘅話… 我可能都會,即係… 我意思話,如果我拍緊拖嘅時候,我會唔會打畀我伴侶呀。可能會打電話畀我伴侶嘅。即係將啲嘢交低畀個伴侶,然之後話畀屋企人聽。但係心裡面應該都係掛住屋企嗰啲嘢嘅。

winnie:咁阿雞就係打畀爸爸?

雞:因為我老豆同我阿媽都會… 即係都喺隔離㗎咋嘛。咁有時,我打畀我老豆,我阿媽會聽電話。

winnie:咁你會講啲咩呀?

雞:講啲咩呀?[稍停] 講吓發生咩事囉。係囉,講吓發生咩事,係囉。「Bye」咁囉。嗰啲囉。

白:我諗我會講「我愛你」囉。

winnie:阿卵呢?

卵:都係會… 可能會講… 即係,如果而家呢個 moment 嘅話,都會講「對唔住」嘅應該。因為我知道我成日令佢哋擔心。咁呢個係,都其實係,都幾抱歉嘅一樣嘢嚟。即係,咁大個人,但係其實佢哋都應該仲擔心緊我。咁所以我會覺得,呢個幾… [強調]即係唔係好生性囉覺得,喺呢方面自己。咁所以會講「對唔住」應該。不過喺嗰個 moment 都 KO 啦,即係… 係呀。咁又再「對唔住」多一次,令佢傷心多次咁解嘅啫。

十、你最想問自己嘅一個問題。

winnie:咁er,仲有一個問題,就係,你最想問自己嘅一個問題,可以係答唔到嘅,可以係無人會答到,或者係你[自己]唔識答嘅啫。即係關於任何嘢啦,總之你最想問自己嘅一個問題。

白:Umm… [各人沉默思考近一分鐘,阿雞一邊練習結他] 我會問自己… 係咪要臨死之前㗎?

卵:[喝著檸檬茶]你當而家啦。臨死之前?唔駛臨死之前啦,係咪呀?

白:我會問自己… er… [沉默二十多秒] 我會問自己… 盡咗力未?我會問自己:盡咗力未?

winnie:唔係臨死之前,即係而家。

白:係。我都會[咁樣]問自己。[低聲] 咁我當然有答案啦自己已經。winnie:唔,你有答案嘅。

白:有!

雞:即係而家呀,係唔係呀?

winnie:而家呢個 moment。

雞:問自己咩問題呀?

winnie:係呀,一個最想問自己嘅問題。可以答唔到都得嘅。[各人沉默思考近一分鐘,阿雞一邊練習結他]

白:喂,你哋兩個呀!你哋兩個…

卵:我綜合緊啲問題。我個人太多問題喇因為。

雞:即係無話… 係死唔死嘅?

winnie:無呀,唔係[上一個問題]嗰個場景呀,係另外一個問題嚟嘅呢個係。

雞:如果我問自己咩問題呀… [十三秒後]

卵:我會問自己幾時先至會有… 動力囉。我個人成日都無乜動力。即係 keep 住好長嘅時間其實做人係無乜動力。即係嗰個… 即係以前── 年輕嘅時候,係會有一啲動力㗎嘛。即係譬如,我細個要入 APA (香港演藝學院) 嘅時候,我會… 好有動力要入到 APA 㗎嘛。即係係咪叫做…「目標」或者點樣?[而家]無乜… 有無啲咩[…]好有一種 motivation 去做一啲嘢嘅一種動力?或者我幾時先至會… 會… 搵到呢一樣嘢。我有少少覺得如果我搵到呢樣嘢嘅話呢,我可能成個人會變。即係好多嘢都會變㗎。即係… er 可能會無咁… 無咁… 收埋自己?可能會無咁… 無咁 hea?即係會er再開心啲?即係… 而家我係,好似所有嘢都無乜所謂咁樣㗎嘛。但其實我心裡面有好多嘢我係好介意㗎,介意好多嘢㗎,即係介意自己好多嘢。即係其實有呢啲情況。

winnie:即係意思你都想搵到呢個動力。

卵:係呀,我覺得搵到呢個動力嘅時候,我個人係會-

雞:生猛啲。

卵:咩話?

雞:生猛啲。

卵:[同意] 生猛啲啦。即係海鮮咁樣咋嘛。即係你唔啱水咁樣,啲水溫唔啱,鹽度唔啱呀,咁好死嘅。你搵到呀,嘩,好生猛嘅。[]

雞:即係你只係講蝦啫,係咪呀?

卵:係。

雞:魚呢?

卵:我諗都嘅。

雞:寄居蟹呢?

卵:即係咸水魚同淡水魚,你將條咸水魚放喺淡水度,唔得㗎。

雞:寄居蟹呢?

卵:寄居蟹佢要搵地方寄居囉。

雞:咁唔關水溫事?

卵:寄居蟹,唔知,因為我無做寄居蟹呢種海鮮*。[眾笑,除了白只]

*阿卵父母在長洲經營海鮮生意

白:寄居蟹係咪唔算係海鮮㗎?
卵:梗係唔算啦,點會有人食寄居蟹,你有無聽過人食寄居蟹?

雞:要難食㗎喎,咁細隻。[稍停] 我會問:仲有咩想做?

winnie:「仲有咩想做」呀?

雞:即係… 係囉,仲有咩想要做。因為… 好多嘢都試過嘞,咁… 咁er 因為有時候,做得好唔好唔係一個… 唔係我最 concern 嘅嘢嚟嘅有時候。Erm,即係當然我會執著一啲嘢啦。有啲嘢我會好執著。咁但係,但係… 某程度嗰個 category 都係我想做嘅嘢吖嘛。即係無論咩類別都好。咁我會問仲有無嘢想做囉。

the unspoken

© 2020 by winnie chau