10 Stupid Questions on Da Air Refresher's Romance (first part)

空氣清新機回答十個好似有關愛情嘅愚蠢問題  Q1 &Q2

 [如果唔知空氣清新機係乜,可以先睇吓呢個訪問:http://www.musemag.hk/textpattern/winniechau/50/air]

  空氣清新機成員:白只、阿卵、阿雞         interviewer: winnie chau

  訪問日期: 21 Jan 2014

行去 studio 做呢個訪問嘅時候,忍唔住問白只:「你咁大膽接受我訪問嘅?」佢有啲驚訝我咁問。係嘅,佢應該驚訝。但並唔係因為上年空氣清新機去台灣環島嗰陣,已經慣咗被我訪問。

 

以自己同白只嘅相熟程度,我敢問佢幾乎任何問題,而唔會覺得自己 stupid,或者令佢覺得我stupid。我知道佢亦都會願意答我問嘅幾乎任何問題。

 

我同阿卵,同白只一樣識咗咁耐,但係比較少傾偈。有時,當你覺得阿卵了解你,係佢無講啲乜嘅時候。

 

我唔敢話我同阿雞好熟,但係唔算陌生。即係,如果你唔係識咗佢好耐,而你覺得自己好了解佢,咁即係你唔了解佢。

 

所以有好多嘢我唔駛問白只,所以我知道有乜嘢唔應該問阿卵,所以有啲嘢我唔會問阿雞。

 

所以,我其實唔適合做呢個訪問。但係,又係最適合。

 

既然佢哋嚟緊嘅音樂會叫做「失戀中人怎麼可能不笑臉迎人」,咁點解唔問佢哋愛情問題呢?不過呢個訪問應該係關於友情,多過愛情。

 

我哋一路途經葵興嘅工廠大廈,嗰時大約夜晚九點。白只講笑:「你又夠膽跟住我哋嘅?」

 

跟住佢哋,我從來都無驚過。

一、 愛情喺你生命裡面有幾重要呀?

錄音開始,擾攘分半鐘之後。

卵:[語氣溫和] 問啦。

winnie:[突然有點尷尬,笑] Er… 我想問,愛情喺你生命裡面有幾重要呀?

白:Oh-my-God!

卵:好… 咩呀,啲問題一嚟就-

雞:好一針見血呀。

卵:一針見血,直接了當呀。

雞:直接了當。Well,我諗最… 好嘅係,*loong man (白只) 你答先。

*白只那天拍劇照要把頭髮電捲,形像酷似編劇好友龍文康 (loong man)

卵:作為一個結咗婚嘅人 (loong man 已婚)

雞:作為一個…已婚嘅-

白:你條問題係咩話?[阿雞笑]

winnie:「愛情喺你生命裡面有幾重要」

白:[十秒後] 我只可以咁講:[停頓] 而家唔係咁重要。[停頓] 可以答完嘞。

卵:有幾重要呀?唔…

白:而家已經唔再重要。

卵:都… 重要㗎。都幾重要㗎其實。即係對一個人嘅影響都幾大。

白:[低聲] 而家已經唔再重要。[不知為何重覆自己的答案]

卵:即係對一個人嘅狀態影響都幾大。即係係咪講緊,有就係狀態好,無就狀態唔好呢?唔係。總知就係會影響你嘅狀態啦,影響一個人嘅狀態。

雞:咁嗰個影響係好定唔好呢請問?

卵:有好有唔好。即係可能係:有,可能你會好開心啦,你嗰段時間可能你嘅狀態會好好,因為你可能會好有信心啦做人,會有多啲信心可能。咁但係,係咪無咗就等於無信心呢? 可能唔係。過一段時間,可能又會有其他嘢令到你有啲信心,但係會影響你嘅狀態,咁所以都係-

白:[突然,以較急速而響亮聲線] 而家已經唔再重要喇。

卵:loong man!

雞:loong man!你結咗婚㗎嘛,愛情唔係咁㗎。

白:[低聲] 我真係太大膽接受你訪問。

winnie:啲讀者會好 confused 點解龍文康-

雞:[大笑] 點解喺度。[然後阿卵阿雞以龍文康的說話方式,模仿他回應問題]

卵:[忽然,正經]都幾重要嘅。都算係幾重要。[停頓] 如果唔重要嘅話,我諗呢個世界都唔會有咁多情歌啦。

白:咁又係,阿卵寫咗好多情歌。

卵:因為我專寫情歌㗎。

白:但係佢個人太感情用事喇。《小炒王》已經係一個例子啦。一首咁嘅情歌,用食物[比喻愛情]嘅情歌。

卵:所以你啱啱都見到我對食物幾咁*執著。

*訪問前吃晚飯的時候,阿卵因為叫的「牛柳炒公仔麵」變了「牛柳撈公仔麵」而不開心。

白:咁 er,食物… 喺你心目中重要啲,定話愛情-

卵:愛情… 我可以話愛情係食物。

雞:嘩。

白:wowwwwwwaaaa!

雞:即係唔好食嘅嘢你唔會…食?你會唔開心一日?

白:唔好食嘅嘢,佢都有食。

卵:[理直氣壯] 如果愛情比喻為食物嘅話,咁我無食過一啲唔好食嘅。[自信]我食親都係好嘢。[白只和阿雞鼓掌]

雞:好。

卵:我係咪已經答咗你後面嗰啲問題喇?

winnie:未嘅,仲有其他嘢嘅。

白:[對阿卵問題的反應] 嘩!

卵:我諗我已經答哂-

白:「我諗我已經答哂,你要問我嗰啲問題喇。」[…]

卵:阿雞!

雞:係,點呀?

卵:[有點惡] 點呀?

雞:對我嚟講係啲乜嘢?

卵:[友善] 唔係,重唔重要啫。

雞:重唔重要,erm 對我嚟講,我一啲都唔 care []。唔… 愛情就好似食物一樣。

卵:喂!好似聽過嘅呢句說話?[阿雞笑]

雞:你知道我係做 summarise嗰個㗎啦。「一啲都唔再重要喇呢一刻,就好似食物一樣。」Erm,我覺得… er 愛情重唔重要呀?一啲啲時段啦。Er,我諗細個嘅時候都重要嘅,即係嗰個係… your only life 啦。咁erm,而家,都其實重要嘅。咁但係重要嘅意思係,係你會… 小心啲去選擇吖,即係你會… 諗多咗嘢啦。咁以前可能無諗咁多嘢,就好似食物一樣。

卵:佢以前食咩都無所謂㗎。[與此同時白只再說一次「已經唔再重要」]

雞:嗱,以前你食咩都無所謂,而家你要諗,點解要食嗰樣嘢。嗰樣嘢有益、健康,erm 嗰個係對身體好。[阿卵竊笑] 哦,但係有時有啲煎炸嘢唔好食咁多。[阿雞笑] 或者係-

白:你想食一啲嘢對身體好嘅而家?

雞:Er,都唔一定嘅。有時候你鍾意食熱氣嘢㗎嘛。我好鍾意食炸雞翼㗎嘛。

卵:唔,係吖。[竊笑]

雞:[] 嗱,你 (白只) 就唔食炸雞翼啦,係咪先?

白:吓?食㗎,我哋都食炸雞翼。

雞:咁你唔會食皮㗎嘛。

白:哦,係。雞:yea。咁我諗可能係… 而家會審慎啲啦。即係或者「ah ok」咁樣囉。

卵:「審慎啲」。唔。

雞:審慎啲囉。即係-

白:但係重要嘅,係咪你生命裡面?而家呢個 moment 對於你嚟講好重要?

雞:呢個 moment… 呢個 moment 又唔係咁重要咋喎。即係呢個 moment 係… 即係所謂… 呢個 moment 有其他嘢重要啲囉。即係呢個 moment 有… 可能音樂對我嚟講重要啲。

卵:wow!you love music。

雞:well,actually I don’t love music。I just-

卵:hate music?

雞:yea,I hate music。But… 可能想… 搵啲嘢寄託吓,我唔知呀。你哋評價吓我吖。

卵:我評價你?你根本就逃避緊呢個世界咋嘛。[阿雞慘叫]

白:答得幾好,唔錯。

winnie:咁我問下一題喇。

雞:[] 佢 (白只)… 你 [向白只] 真係答咗嗱?

白:答咗喇:愛情對… [嘗試重複答案,但又放棄] 佢 (winnie) 會識得揣摩㗎啦。[明確說出] 而家,愛情已經唔再重要。

雞:「唔再重要」。

二、失戀之後,最唔想聽嘅一句說話。

winnie:第二題,失戀之後,最唔想聽嘅一句說話。[各人沉默十秒]

雞:咦,我要 call 返啲記憶,因為太耐喇,所以你哋答先啦。

白:咁如果講最容易召喚到嗰個記憶嘅話,應該係…

卵:你 (白只) 望住我做乜呀?

白:[心虛] 應…該係我。[阿雞奸笑,半晌之後] 真係太大膽喇,

我哋真係太大膽。下次問清楚你 (winnie)。

雞:我諗呢個訪問要完喇。打畀阿龍(經理人)吖。[]

卵:阿龍,點解會接到呢個訪問㗎?[winnie笑]

雞:點解會接到呢個訪問㗎,阿龍?邊個嚟㗎?

winnie:阿龍係唔知㗎 。

白:[感嘆] ah,失戀,最唔鍾意聽到嘅說話。[…]最憎?又無乜喎我。

卵:大家都唔敢同你 (白只) 講真心話。

白:係囉,真係無聽過… 真係無乜…

winnie:如果[人哋]叫你喺返埋一齊呢?即係叫你「唔好分手喇」,

咁你都覺得 okay 呀?

白:叫我喺返埋一齊呀?[語氣平淡,帶點諷刺] 喺返埋一齊?喺返埋一齊?

白癡㗎、腎㗎。

卵:但係佢唔覺得係憎,佢只係覺得「白癡、腎㗎」。

白:係囉。即係… 我又未去到憎佢講嗰啲說話-

winnie:唔想,未必係憎嘅,唔想聽到[嗰]啲。

白:我會話… 我應該未聽過嘅,呢句說話,但係我估我最憎聽嗰句說話係:

「你都預咗㗎啦」。

winnie:唔、唔。

白:[嘗試延續那句話]「你好好咁生活落去…」

卵:係咩?有人同你講過?

白:無呀。梗係無啦。

卵:即係你覺得如果人哋咁樣同你講,你就會最憎嘞?

白:係呀。

卵:[向阿雞] 今晚試吓先。

雞:好,「預咗㗎啦」。

卵:我無預到呀。

雞:你 [向阿卵] 可以答返。

卵:我就係… 嗰啲即係… 應該係…「喂!你諗清楚啦。」「諗清楚啦。」──即係

有啲嘢係,我梗係想諗啦… 呢啲係好咩… 喂,我諗緊啦,即係講到好似係,你-

雞:無諗過咁樣。

卵:講到好似無諗過咁樣。即係… 可能你係諗得唔夠仔細,或者根本上你有時係

諗唔到,你喺一個混亂嘅狀態入面,你都唔清楚好多嘢。

白:做呢個訪問,阿雞,你搵啲音樂播一播。播少少音樂,幫我哋進入一個…

[winnie笑] 談論愛情嘅情緒。[啲音樂]唔好太噪…[與阿雞談播甚麼]

卵:播啲 heavy metal 吖唔該。

白:播返啲八十年代嗰啲。

卵:[繼續回答問題] 即係… 咁梗係啦,我都知啦… [嗰句]係一啲好心地嘅說話

嚟嘅。即係有啲叫做忠言逆耳吖嘛。

白:「忠言逆耳」。

卵:因為嗰啲嘢正正係「鋭」緊你嘅… 懦弱嘅地方吖嘛。

winnie:咁嗰啲人好心嘅意思,即係話佢想你唔分手,所以咁樣講?

卵:Er,未必係。即係佢可能見你自己[喺]一個好混淆嘅狀態,咁咪所以先叫你諗清楚。但係有時係,嗰個「諗」係,好似… 要話畀你聽,你… 你… 處理唔到嘅。即係但係其實… 唔係,咁可能係事實嚟嘅嗰樣嘢。所以我話「忠言逆耳」咋嘛。佢講嘅嘢唔係錯、未必係錯,但係,有時就係會辛苦,聽到呢啲說話。因為自自然然,人係會有種… 想去… 避開一啲… 唔開心,或者係辛苦嘅事。呢啲會幾… 幾… 點講呀,唔識講。

winnie:「幾難受」呀?

卵:翳住囉喺當下會。即係你會… 有咁嘅反應囉。[示範被對方的話擊中,但還要認同對方那狀態]

winnie:咁阿雞呢?

雞:唔… 最唔鍾意人哋… 我諗,er 「你點呀?」嗰啲囉。[白只隨即模仿那種慰問] 但係嗰個「你點呀?」係,佢知道一啲嘢:「你點呀?」,咁好似你每一次都要… 講畀佢聽發生[乜嘢事],要講得好清楚,話畀佢知做乜嘢呀咁樣,即係每一個次序係點樣樣。咁每個人都走嚟同你講「你點呀?」,咁嗰「你點呀?」嘅時候… 唔.. 你要講畀佢聽囉,咁你要… 經歷… 即係你又要好似經歷嗰件事咁囉。

白:又要再講多次。[…]

雞:係嘞,即係又要再講多次,咁樣囉。[各人沉默,然後 iPhone 傳來Adele《Love Song》嘅第一句「Whenever I’m alone with you」,阿雞笑]

白:進入個 mood 喇我已經,嚟吖,[呼叫] HIT ME!

winnie:咁我問第三題喇, 好唔好呀?

 

 

Go To: 10 Stupid Questions on Da Air Refresher's Romance (second part)

the unspoken

© 2020 by winnie chau