Search By Tags

伍宇烈想問我有關舞蹈嘅十個問題 (九) define ‘what is dance’

九、你可唔可以 define ‘what is dance’──尤其是當嗰樣嘢人人都認為佢唔係 dance?

Winnie: Er,有個講法話:喺呢個時代,乜嘢都可以係 dance 吖嘛。即係好似:Anything goes。我唔知係咪 postmodern 嘅理論啦。首先我知道有呢個 notion,我亦都覺得… 我算係相信嘅。咁你[對嗰樣嘢嘅睇法]咪會闊咗好多囉。[…] 你起碼有呢一個 awareness,知道先,而我傾向係信嘅,[但係]我唔係話,[要]攞呢個 theory 嚟去… argue against 一啲嘢嘅。[…] 平時日常生活揸筆呢個動作,都可以係 dance ──睇吓你點樣呈現出嚟囉。

Yuri (伍宇烈): 你覺得喺咩情況下呈現,你就唔當佢係 dance 呢?

Winnie: 當你… erm… 我唔知咁樣答啱唔啱… 當你唔係表演畀人睇嘅時候,點講呢,er,即係譬如我揸筆,我真係為咗寫字嘅話,我覺得呢個就唔係 dance 喇。[強調] 但係!當你睇我嘅時候,你覺得呢個 moment 好靚,即係可以做一個 dance,我又覺得 arguable 嘞。

Yuri: 究竟邊個決定你而家呢個[動作]係咪 dance ,係我作為觀眾決定吖,定係你主動覺得係?

Winnie: 我覺得兩者都有權決定囉。

Yuri: 唔。

Winnie: 就算[chorographer/dancer]自己話:唔係 dance 嚟嘅 […] 但係觀眾話:係喎,我覺得你係。

Yuri: 咁你覺得點解有啲人會[覺得]係咁樣,有啲人覺得唔係咁樣?

Winnie: 唔… 因為個 definition 唔會清楚。

Yuri: 咁但係點解有啲人話,你舉例話揸筆,有啲人就話係,有啲人話唔係,點解有咁大嘅落差呢?你認為係咩原因呢?

Winnie: 佢嘅 conception 囉。即係,佢… 要問返佢覺得乜嘢係 dance 先。佢可能有啲 criteria 㗎嘛, 即係佢心裡面,有啲 standard 係可以對證㗎嘛 ── 雖然佢未必列哂出嚟。但係佢一定會,內心裡面,已經 judge 咗係唔係喇呢個。[…] 咁啲 standard 唔同囉。咁咪有落差囉。

Yuri: 佢嘅唔同係同人哋唔同,定係同個編舞唔同,你覺得?

Winnie: 同人哋唔同,或者個個人都唔同嘅。

Yuri: 個個都唔同嘅時候,點呀即係?即係唔會有客觀嘅睇法?

Winnie: 或者剩係得主觀嘅睇法。Er… 係㗎!但係咁樣先好玩嘛。[…] 就係佢有趣嘅地方囉。 Er,因為你可以 challenge 佢吖嘛。佢個 boundary 咁模糊。就算其實佢 fixed 你都可以 challenge 佢。唔,點講呢,即係例如,無 definition 嘅嘢── 其實好多嘢都無 definition 㗎嘛。根本呢個世界上所有… 可以話所有嘢個 definition 都唔穩陣嘅其實。咁,咩係人啫?動物同人有咩分別?或者咩係愛情?即係,每個人有佢自己嘅答案,但係無一個共通㗎嘛。咁嗰樣嘢先得意吖嘛。可能[我同你]唔鍾意數學嘅其中一個原因就係:一加一永遠等於二嘅點解?

Yuri: 唔係有人想 challenge 呢樣嘢㗎咩?

Winnie: [四秒後] 有… 有啩。嗰個人就係藝術家囉。[如果佢 challenge]一個好 fixed 嘅定律。當然唔係[指]好似科學家咁猛咁去 [question] 一個實驗嗰種 question。嗰啲真係科學探究嘅 curiosity。嗰種就唔同。[…] 地球係圓嘅,但係你想 challenge 佢,咁可能嗰個係一個詩人──「因為喺呢個 moment,我覺得我同你一齊,個地球已經變咗唔係圓嘞」。即係呢種都係 challenge 吖嘛。當然你唔係話要證實個地球唔係圓,即係你知道係圓嘅 somehow-

Yuri: 呢個 assumption 幾得意:你都知道佢係圓…

Winnie: [] 但係-

Yuri: 無 assumption 點得呢呵?

Winnie: 係呀。

Yuri: 點解會有 assumption 呢?點解有啲人要奉指要 challenge 人?

Winnie: 係嘞,掉返轉嚟講,如果無 assumption 呢,就真係好 insecure。即係無 assumption 到一個地步,就係… 我自己成日會覺得,如果你 question 到一個地步,就係… [例如]我見到呢度有本簿,我點知我自己係見到係有本簿呀?即係你覺得係啫,你覺得自己拎起咗啫,但係其實無㗎喎。即係你可以 question 到呢個地步。咁係好 insecure:我而家喺度做緊咩呀?我信唔信我自己跟住落嚟做嘅每一件事?我係咪同你傾緊偈,但係我幻想咋?

Yuri: 所以你會話佢癡線,唔會話佢係藝術家。

Winnie: [] 但係藝術家同癡線,係咪好貼近㗎其實?[][…]

Yuri: 點解唔可以 doubt? Doubt 唔一定係痛苦 […] 個 insecurity 唔係一定係 painful。 Insecurity 係一樣咩嘢呢?只不過佢同好多人唔一樣。人人都係想[有] security 嘅。[但係]有啲人 wallow in 呢啲 insecurities、strive on these insecurities,因為[咁樣]佢先叫 keep moving 吖嘛。[…]

Winnie: 吖,咁我而家反問返你,點解要咁執着呢啲 definition 先?點解要咁執着佢係咪 dance 先?

Yuri: 我唔係好執着呢樣嘢。我成日都去 question 呢樣嘢。我可能執着就係要問。[…] 咁啲人就介意我成日問,咁佢咪覺得:「唔好問得唔得啫?」得!我咪唔好問囉。[…] 就算我重新 define 過佢,都係[用返]嗰句[definition]呢,都係要有呢個問㗎我覺得。

Winnie: 即係你其實覺得重要嘅,唔係嗰個 definition,而係嗰個 questioning。

Yuri: 係呀!我今日呢個 defin[ition],我咪答咗今日囉。你聽日再問我,你點知我今晚到聽朝之間經歷咗啲咩嘢呀?我有個全新嘅答案,[變成]聽朝嘅答案囉。I don’t know tomorrow’s 答案 until tomorrow comes。係咪啫?[…] 所以嗰個 definition 係一個 temporary 嘅嘢嚟嘅。佢唔係 permanent 嘅。

Winnie: 係吖係吖。

Yuri: [激動] 所以駛乜驚啫?

Winnie: 係呀。

Yuri: 但係我哋好少喺度加一句:「呢個係我今日嘅 definition 㗎咋。」啲人覺得好嘥氣講呢句嘢。咁所以我哋畀咗呢個答案,啲人就會捉住你呢個答案,[斷定]你一定[以後都]係咁講。Come on。[有人] 會話:「咁你咪好容易推翻你自己啲嘢?」喂點解唔可以啫?人係會變,時間係會變。時時刻刻你對我嘅 perception 都會變緊啦!呢個係好正常!係正常不過嘅嘢。 […]

訪問日期:2013年6月6日

first published on muse blog on 25 nov 2013

http://www.musemag.hk/textpattern/winniechau/99/answers-for-yuri-s-10-questions-on-dance-f

the unspoken

© 2020 by winnie chau