Search By Tags

伍宇烈想問我有關舞蹈嘅十個問題 (十) 人死咗,會唔會跳舞㗎?

十、人死咗,會唔會跳舞㗎?

Winnie: [七秒後] 呢個答案係我希望嘅── 因為我無辦法知道吖嘛。我亦都無想像過人死後真係點嘅,無認真去諗過。但係我希望佢哋可以跳舞。

Yuri (伍宇烈): 係會點跳呀?

Winnie: [十秒後] 有無限嘅 possibilities。[…] 可能[係]我都想像唔到嘅跳法囉。我希望係,我想像唔到嘅跳法。[…] 可能未用到我哋而家生存緊嘅狀態諗到嘅嘢。

Yuri: 咁但係,你好嚮往嗎?你嚮往呢種跳法嗎?

Winnie: 唔… 都嚮往,同埋就算係以生存緊嘅[認知],譬如 ballet 咁,我生前唔識跳,但係我死後可以跳。我都好想。好想可以做到呢樣嘢囉。

Yuri: 咁同 freedom 有無關係呢?

Winnie: Freedom 定 freewill 先?

Yuri: Freedom。

Winnie: 你話想跳舞呢樣嘢?

Yuri: 跳嘅狀態。[…] 係咪即係話:anything goes-

Winnie: 但係呢,有一樣,你咁樣問,我有一樣嘢其實都幾抗拒,就係,improvisational 嘅 dance 呢,我都幾抗拒。雖然我知道,喺 rehearsal 嘅時候,係 improvise/devise 出嚟嘅,有好多動作,即係 contemp 嗰啲,以我所知啦。因為我睇過一啲係,同個 dancer 同步都唔知[下一步係點]嘅,雖然佢心裡面有少少概念啦,但係我同佢去同步搵啲嘢呢,我覺得… 我唔鍾意睇呢啲舞其實。其實係好[多] freedom 㗎嘛。你講 freedom 嗰樣嘢,即刻勾起我[諗] improvisation,即係無 restriction、無… concept 嘅嘢。因為-

Yuri: 無 concept 嘅嘢-

Winnie: 即係點講呀… 無一個 image 或者,無一個方向。無一個好 clear 方向嘅嘢。

Yuri: 咁如果個方向,包括只係在於我喺八點鐘開始、我選擇着呢套衫、一定要着呢個顏色嘅嘢,同埋選擇呢,喺呢個[台]範圍裡面去做,選擇你可以自由接觸一啲嘢,因為佢講緊人生嘅無定向風、人生嘅無限可能性。

Winnie: 咁呢個我覺得又唔同囉。

Yuri: 唔係,但係你唔會知㗎嘛。即係,無 programme notes 嘅時候,你唔會知㗎嘛。Winnie: 係… 咁我唔知嘅時候,我就應該唔會幫佢諗呢啲啦。

Yuri: 係。我意思即係話佢有 concept 囉。即佢其實有 make decision,只不過所有 movement language 係無[arrange]。抑或係,佢無 reach 到你呢?

Winnie: 但係咁,嗱如果你咁樣講,當我哋諗人生無常,咁,所有你即時跳,就算我唔識跳,我即時做一啲動作 […] in the moment 跳一啲嘢。

Yuri: [例如] Disco、club。

Winnie: 係啦。

Yuri: Um hmm。

Winnie: 咁都係反映緊人生-

Yuri: 人生無常。係吖!

Winnie: [] 咁咪個個 improvisational 嘅嘢都係講緊嗰樣嘢囉?

Yuri: 點解唔得呀?

Winnie: 得!但係我唔 enjoy 囉,我可以直接答你。我唔 enjoy。

Yuri: 你係唔 enjoy 佢呢個人生無常呢個 concept 吖,抑或係,咁樣處理人生無常吖? 抑或係-

Winnie: 我唔 enjoy 咁樣處理人生無常。Er,喺某啲情況可能可以嘅,但係 in general improvisational 嘅 dance […] 因為我同步同個 dancer take risk 㗎。即係我都唔知,原因你都唔知喎。唔係[剩係]我觀眾唔知你下一步點,而係,我哋一齊同步。即係可能有啲人覺得呢樣嘢係好 beautiful 嘅。我覺得 conceptually,係吖!即係唔知你下一步點係好… 浪漫嘅。但係,我如果真係睇一隻舞,我要同你一齊去搵一啲嘢嘅時候呢,你又唔係好 sure 其實你頭先個動作… 如果你稍後諗返,你覺得:「呀… 唔應該咁樣㗎。」[…]

Yuri: 呢個佢技巧問題嚟㗎噃。佢有 regret […] 大部份 improvisation 都係── 輕微又好、強烈又好── 都係關於 making choices 㗎嘛。

Winnie: 係、係。

Yuri: 當佢好容易就 regret 佢自己嘅 choice 嘅時候,你係咪介意呢樣嘢囉。

Winnie: 係呀,我有少少-

Yuri: 咁呢個係同 improvise 係無關係㗎嘛。老實講,就算佢排起哂呀,佢都可以係完全無感覺㗎嘛。

Winnie: 但係,improvise 多啲咁嘅 chance 囉。好多咁嘅 chance-

Yuri: 唔知喎。咁你睇吓嗰個人嘅狀態係點樣。[…]

Winnie: […] 有時,可能我會 interested 嘅:如果嗰個跳嘅人係好特別,即係佢有啲嘢,我好想睇佢喺呢個空間裡面,畀佢好多 freedom,佢會做啲咩出嚟。[…] 但係 in general 我係唔鍾意睇 improvisation。即係講得簡單啲:有少少好似呃人囉。呃人嘅意思係:cher,你都唔知你跳咩、你表演啲咩畀我睇,又要我嚟睇你。除非,我覺得,我哋大家知道而家佢會做任何嘢㗎喇,你敢唔敢嚟睇?你想唔想嚟?跟住,可能會有人:「喂,好想呀。因為我就係想睇佢呢個狀態」嘅話,就 okay。但係我唔係太 enjoy。

Yuri: 唔。成立嘅。[Winnie 笑] 所以[你對]dance after life 無乜特別嘅諗法其實真係?

Winnie: 無乜特別嘅諗法呀?我估囉…或者我想佢應該係多啲可能性嘅。

Yuri: 咁即係同 improvise 係有關係,定無關係呢?

Winnie: 其實[…] 你咁問我,我第一[刻] 有個 image 啲人── 即係天堂好 typical 嘅 image ── 好 free 咁樣喺度周圍走嗰啲舞。我有呢個 image 嘅頭先。但係,我唔鍾意。我唔想又係咁。即係,而家 existing 在世嘅都有類似嘅嘢啦。即係好似,懶係 free 咁樣去跳一啲嘢出嚟啦。但係我覺得唔好睇喎。我覺得[死後嘅舞] 都有 discipline 嘅。但係,可能你死咗就可能性更加大,可能你唔 restricted by 你嘅 body 添。即係[你]嘅 ability。咁你嗰樣嘢應該係,再要好玩啲。再會好啲嘅── 如果天堂係大家 assume 係一個好嘅地方嘅話。[…] 同埋無我哋頭先講嗰啲執迷嘞。 即係,嗰啲死拗話:呢個唔係 ballet,呢個唔係乜乜乜,呢個唔係舞嚟嘅。可能無呢啲添。[…]

訪問日期:2013年6月6日

first published on muse blog on 30 nov 2013

http://www.musemag.hk/textpattern/winniechau/100/answers-for-yuri-s-10-questions-on-dance-g

the unspoken

© 2020 by winnie chau