Search By Tags

10 Stupid Questions (1st wise interviewee) 劇場導演/演員 李鎮洲

四、你喺 dressing room 做過最 crazy 嘅嘢係乜?

五、有無一句劇評或者觀眾嘅說話,令到你「aaah 」,好傷?

六、你上一次喊係幾時?

and... 十個我對李鎮洲嘅印象

我諗我都幾大膽,唔係因為問咗呢十題問題,而係我問嗰陣,完全無用筆寫低李鎮洲 (CC) 答嘅嘢 ── 我平時會咁做,除咗怕錄音機錄唔到,係想搵啲嘢做,等自己同被訪者無咁 self-conscious。今次,真係錄唔到。

憑記憶喺訪問之後,兩個鐘內,打咗出嚟,然後 send 畀 CC 睇吓有無錯漏。有啲諷刺,因為我哋兩個都係好想忠於原著嘅人。

一、你細個嗰陣鍾意玩啲乜?

我會收集一堆玩具,其實唔係玩具,有啲係膠粒,有啲係好細嘅人型公仔,重有一啲大約一吋高嘅木製戰鬥棋。將佢哋攤哂喺地下,分成兩堆,對打。會 fantastise 一啲對話。 同兄弟姊妹玩?自己一個,之後玩咗無幾耐,我細佬就跟我咁玩。

二、 如果你唔係做劇場演員或者導演,你覺得你自己會做啲乜?

其實有個 job 係做 clerical assistant── 即係 clerk 嘅 assistant,要去送信嗰啲。係政府度做,佢取錄咗我,但係我無去做。幾時?嗰時大約[19]78年。 嗰時係咪已經做緊演員?重未做演員。如果我唔做演員,我諗我都係會做啲文職工作。

三、你一生人最唔鍾意做嘅三樣嘢係乜?

參加婚宴── 我而家已經無嘞。同啲嚴父樣嘅人 (father figure) 傾偈,其實都唔會有咩傾。要我覆述一啲事件,或者故事。我好無心機講返出嚟。例如,睇完套戲覺得好好睇,你問我頭先套戲講咩,我會… [他表露出面容扭曲,有口難言的樣子]…

四、你喺 dressing room 做過最 crazy 嘅嘢係乜?

整印度薄餅。嗰時蘭桂坊有間六四吧,旁邊有間食店,有個整印度薄餅師父 [模仿師父翻騰麵粉團姿勢]。 咁你喺邊度搵舊麵粉嚟?無呀。你 mime 呀?係呀。[再模仿師父翻騰麵粉團姿勢],盧智燊笑得好開心。喺中英[劇團]嗰陣?係呀。

五、有無一句劇評或者觀眾嘅說話,令到你「aaah 」,好傷?

好耐之前,有一張報紙,話:你哋唔好再讚李鎮洲,佢唔係演員,佢只不過係海洋公園嘅── 嗰隻唔知係咪海獅… (其實係殺人鯨) ── 海威小姐。

六、你上一次喊係幾時?

[想了一會] 吖,最近有一次睇 YouTube,有人將《心經》結尾嘅咒,用梵音唱出嚟,由一把女聲唱,不段咁重複,我一路聽住,就喊咗出嚟。 你知道梵文嘅意思?知道,係話,到彼岸。

七、你鍾意聽乜嘢音樂?

其實我無乜點聽音樂。我鍾意聽一隻CD 叫「 Indian Chants 」,係啲 prayer 嚟嘅。

八、如果你要滯留喺荒島,你只可以帶一樣嘢,你會帶乜嘢?

一本好厚,好難讀、好深嘅書。

九、 你會唔會肯全裸演出?

我 okay 㗎。其實之前,有個演出,我提議過喺一幕背住觀眾全裸。其實係同梅卓燕做嘅 [《藍舞》],提議兩個人全裸坐喺一個 video projection 前面,個 projection 影住水族館裡面,有好多魚游嚟游去。但係最後無咁做。

十、你想問你自己嘅一個問題── 可以係自己答唔到,或者唔知道點答嘅問題。

其實呢排我都想問… 我爸爸過咗身好耐,我好想問佢喺我呢個年紀,諗緊啲咩。

十個我對李鎮洲嘅印象

一、就算係匆匆嚟到一個約好見面嘅地方,坐低,佢第一件會做嘅事係,游閒咁細聲哼歌。

二、 佢唔鍾意講嘢,通常都唔想騷擾佢。但係,當可以單獨同佢傾偈,就發現自己喺佢面前不停講嘢,講好多嘢畀佢知,多數係關於劇場,講十幾廿句,佢可能先會答一 兩句。可能因為知道佢喺度聽緊,可能我信得過佢。我唔止一次問佢,我係咪講得太多,然後佢會話,佢鍾意聽多過講,不過我仍然會覺得唔好意思,因為好似 disturb 咗佢嘅 inner peace 。

三、佢導演嘅 vision,令我覺得佢信得過。

四、佢係一個非常忠於劇本嘅導演。

五、佢身上有 gentlemen 用嘅手巾 。

六、佢可以用 Received Pronunciation (Queen’s English) 講英文,極少本地 non-native-English-speaking actors 可以做到。

七、佢無讀過 APA。

八、 我唔算睇過佢好多演出,喺我未正式睇佢嘅演出之前,有個我好信得過嘅演員,話畀我知,李鎮洲好勁。

九、 原來真係。佢曾經用一個好 neutral 嘅語氣去講,Camus《The Outsider》(《異鄉人》) 嘅第一句:「我媽媽今日死咗,定係尋日呢,我唔知道。」我覺得好好,因為本書講緊嘅係 existentialism。

十、 好記得佢講過,佢做演員,演繹角色,講台詞嗰陣,要不求甚解。

first published on muse blog on 29 march 2013

http://www.musemag.hk/textpattern/winniechau/68/10-stupid-questions-for-1st-wise-interviewee

the unspoken

© 2020 by winnie chau