Search By Tags

10 Stupid Questions (2nd wise interviewee) 劇場服裝及佈景設計 余岱羚

三、喺着衫方面,你覺得最核突嘅形象/配搭係咩?

五、 你怕唔怕黑呀?

九、你覺得男人同女人最大嘅分別係咩呀?

and... 十個有關余岱羚,你可能唔知道嘅事

其實,我唔係好認識岱羚。雖然間中喺唔同場合會遇到,而自己平時睇嘅舞台劇,十個 production 有六七個都係佢做服裝設計,但係對佢嘅認識都只係表面── 佢着嘅衫,同佢幫人設計嘅衫。

好難唔問佢有關着衫嘅問題,不過佢答嘅嘢唔會只係關於着衫。

一、你覺得咩係靚呀?靚呀?

其實真係好難答喎。其實呢靚… 真係好玄地講呢,我覺得係個心,如果嗰個人個心係靚呢,佢望嘅嘢係真係會靚啲嘅。所以靚嘅 definition 呢 … 當然係,個人嘅一個答案嚟嘅。有時啲人會覺得李嘉欣好靚,但係我會覺得佢唔靚,因為佢… 我唔覺得佢有… 靈魂。剩係個殼,我就唔覺得靚。

二、如果你出咗街先發覺嗰日着嘅衫唔啱、或者襯錯咗,咁你會點?

我呀,其實我會返屋企換㗎。其實呢啲嘢發生呢,就好少嘅。因為我一係就求其到,人哋都覺得我求其得嚟有啲嘢嘅。即係我會盡量令到… 就算求其呢,着件 T-shirt 同牛仔褲呢,可能戴頂帽就會畀人覺得:「咦,襯過吓喎」。但係其實我只係用咗五分鐘換衫咁樣。但係如果真係萬一着錯衫呢,通常呢,我係覺得我着嗰套衫嘅場合唔啱。即係明明本身只係去開會嘅啫,但係原來夜晚要去睇首映喎,或者睇[舞台劇] opening 喎。咁我就真係會返屋企換衫。或者去買一套囉。我有一次試過買一套囉。

三、喺着衫方面,你覺得最核突嘅形象/配搭係咩?

我覺得最核突係,人哋要着乜,你就要着乜。近排好興 all-back 頭… [望向周圍的人] 我驚得罪人… 其實 all-back 頭係一九三幾年,歐洲嘅一啲 hair style 嚟嘅。即係點樣㗎其實?即係側邊剷青,然後中間有一「pat」頭髮,向後梳。係咪特別係男仔- 係嘞,男仔。 [有點肉緊] 我係好… 我覺得好核突嘅真係。因為亞洲人係好難 handle 到嗰種 style 嘅頭,但係因為興,咁然後呢,個個都整!同埋個個都用啲好強力嘅 gel,gel 到個頭令哂咁樣… 我真係唔得呢個… 其實有一部份嘅人着衫襯返,我係覺得 okay。但係如果佢 all-back 頭,但係下身完全唔係嗰個 style 呢,我覺得好核突。我成日叫啲男仔:你唔好再整,好核突呀,好核突呀咁樣。即係所以我諗呢個問題嘅答案,就係,其實佢做啲唔襯嘅嘢,但係因為潮流,而去 follow 囉。 [停了半晌,聯想到甚麼,然後顯得有點厭惡] 真係好核突呀。

咁我想問如果… [倆笑] 你男朋友係咁-我想話畀你聽呢,我而家嘅男朋友係咁,哈哈。但係呢,你繼續問你個問題先… 我想問如果你個男朋友係咁,或者你鍾意、心儀嘅男仔係咁,咁你會點樣?咁樣係涉及到我對愛情嘅觀點㗎喎。因為我係從來唔會想點樣改變我身邊愛嘅人嘅。即係如果佢着衫係唔好睇呢,我係唔會要改變佢囉… 佢食煙我係唔會改變佢,要佢:唔好食呀!咁樣嘅。即係… 咁嗰個先係佢嚟㗎嘛。

四、你覺得人哋對你嘅最大誤解係乜嘢?

最大嘅誤解係… 本身我個樣生得好細個啦 [],然後覺得我啱啱畢業嗰啲啦。以前係有少少困擾嘅… 年青嘅時候一定會嘅。即係而家諗返,當其時我係想… 可能:不如化吓妝啦、不如剪吓個髮型,老成啲,令到人會信任我多啲。但係最後我都無做到呀。我都係覺得:不如做好啲嘢啦。即係你做好啲嘢嘅時候,人哋就會繼續搵你。最後[人哋]通常都會問:咦,你幾多歲呀?

咁你介唔介意話畀人聽你幾多歲㗎?我三十歲囉。

五、 你怕唔怕黑呀?

唔怕㗎,吓我勁鍾意夏天,我勁曬,我係唔會搽防曬嗰啲嚟㗎喎─ 唔係呢種「怕黑」呀─ 哦,你話「怕黑暗」呀? 係呀。[倆笑]

[強調] Dark ──我係唔驚嘅我都。 Tan ── 我亦都唔驚。

如果你問我驚唔驚無開燈嗰啲… 我係完全唔會驚嘅。我係唔驚鬼㗎,我係勁睇鬼片,同埋勁睇血腥片都無事嗰啲嚟㗎。[稍停] 有啲感受到靈異嘢嗰啲朋友呢,佢話我一企喺佢哋側邊呢,嗰啲陰暗嘢就會走㗎喇 […] 所以我諗我係好正氣。

六、如果你可以幫一個人 design costume ,或者衫── 可以係天馬行空,嗰個人可以係死咗都得嘅── 你想嗰個人係邊個?

[想了一分二十秒之後] 我好鍾意一套戲,我諗你都會知嘅:《Midnight in Paris》。佢裡面呢,咪好多名人 [包括 Ernest Hemingway、F. Scott Fitzgerald、Pablo Picasso 同 Salvador Dalí 等等] 喺[現]代出現返嘅,其實我估我好想搵返嗰啲人出嚟,幫佢設計返啲衫。

七、咁如果要你用一隻顏色形容你嘅性格,你會用咩色呀?

哈哈哈哈,呢個問題呢,我又要講吓喇。我由細到大,人哋鍾意郭富城、人哋鍾意黎明… 四大天王都好啦,我係永遠揀唔到一個人鍾意嘅。然後呢,細個[人哋]會覺得紅色係女仔,藍色係男仔啦,我細個都會有個疑問:點解要揀一個顏色呢?跟住呢,人哋開始寫紀念冊呢,咪會有「你最喜愛的顏色」嘅,我係唔識囉,寫「唔色」咁樣。因為,我唔知點解,由細到大都覺得自己,對於 colour 呢樣嘢呢,係無一個特定嘅 definition 嘅。因為可能就係覺得任何顏色,如果你 match 得靚呢,就係靚囉。唔係因為佢係乜嘢顏色而靚囉。

八、 可唔可以講一個你發過嘅惡夢呀?

我成日發嘅一個惡夢呢係,隻 con ── 因為我係戴 con 㗎 ── 隻 con 呢,變咗好硬,然後要戴落隻眼度囉。但係嗰個夢呢,唔係畫面嘅恐怖,係嗰個質感嘅恐怖。唔知呀,成日一病之前就[發類似嘅夢]。

九、你覺得男人同女人最大嘅分別係咩呀?

[笑,然後細想] 嘩! [笑,稍停] 我覺得女人真係麻煩嘅。其實我都好怕… 如果有一堆女人喺度講緊嘢呢,我好怕行埋去嘅。我覺得女人係好麻煩。佢容易妒忌人啦、佢容易小心眼啦、佢容易將所有嘢講哂畀人聽啦。女人嘅麻煩喺呢一度。咁當然女人都有溫柔嘅一面嘅。但係男人就… [思考着] 嘩,真係好難… 我剩係覺得女人好麻煩囉。男人…[] 男人… [] 唔麻煩,相反? 因為麻煩嘅男人,就係有女人嘅性格,佢先會麻煩囉。[] 所以好難答喎。如果真係一個好嘅男人嘅話,佢會有承擔啦、佢會有體諒啦。總之,男人唔可以有女人嘅性格,佢就係一個好嘅男人喇。[倆大笑] 咁好嘅女人係咪要有男人嘅性格呀?但係好嘅女人又唔係要有男人嘅性格喎。好嘅女人如果 [] 無頭先我講嗰啲呢,就係一個好嘅女人囉。[大笑]

十、你最想問你自己嘅一個問題── 可以係自己答唔到,或者唔知道點答嘅問題。

因為近年嚟呢,我覺得人生呢,都係,只不過係學習緊嘅。你遇到嘅所有嘢呢,都係學習嘅其中之一個障礙,而你學咗之後呢,佢會幻化另外一啲嘢嚟話畀你聽,你學咗嘅。可能呢幾年我覺得我自己大過咗少少,咁我有呢個體會。咁我就會問自己… err… 我會唔會再勇敢啲去學習更加多嘅嘢。因為勇敢都係好緊要㗎。其實當你唔勇敢呢,你就唔會學到所有嘢嘅。

十個有關余岱羚,你可能唔知道嘅事

一、 名字

「我阿媽畀咗一個好嘅名我,即係余岱羚都係一個幾特別嘅一個名 […] 阿媽嗰陣時,佢話睇類似 Discovery Channel 嗰啲呢,佢話見到有個畫面好靚。 […] 見到隻羚羊咁辛苦 [爬] 上咁高嘅山上面,重要係好陡斜㗎嘛,佢覺得係好靚嘅一件事。佢覺得呢一種意志係好強,同埋嗰個畫面係好靚嘅。咁然後佢就覺得個『岱』字好有意思,因為佢係解一個好高嘅山。咁佢就將呢兩樣好靚嘅嘢擺埋一齊嘞。 […] 佢話個『岱』字係泰山嘅別名。」

二、 爸爸媽媽

岱羚嘅爸爸係消防員,媽媽以前係英文同美術老師。

「咁我阿爸同我阿媽點樣識呢,就係喺畫班嗰度,畫油畫嘅時候識嘅,咁所以呢,好詩意㗎呢件事係。」

三、 最難造嘅 costume

「其實我成日都會遇到一個問題,就係,你無咁嘅錢,但係你要做超越嗰個 budget 嘅效果 [嘅 costume],咁我就會,心裡面呢… 又有少少驚,但係又死都要做到。其實當你個信心覺得可以做到嘅時候呢,就發現乜都唔難囉。但係你要超越嗰個驚先囉。[…] 如果 technical 上呢,我覺得抄襲一啲,即係照足一啲好歷史嘅嘢,係最難嘅。」

四、costume design 理念

「由細到大呢,可能都會有啲人講話:『舞台係一啲遠嘅嘢嚟嘅。』咁呢,遠嘅時候,其實啲觀眾有時唔係話會睇得好清楚,咁就算嘞 [唔做得咁仔細] 。 咁呢,我係唔同意嘅。所以我係會想將一啲舞台誇張,誇大咗嘅衫,擺落去,或者多啲 fashion 嘅嘢,即係一啲仔細少少,detail 啲嘅嘢去呈現返件事,令到嗰個感覺再近人類少少。[…] 因為[觀眾] 嘅眼睛永遠係雪亮㗎,如果你呃佢哋呢,佢哋係會知㗎。」

五、曾經參與設計嘅 stage production 嘅數目

「我真係無數過喎。同埋我有一個習慣嘅,好似以前讀書咁樣㗎,就係讀完嗰篇文呢,考完[試]之後呢,我係會即刻 delete 咗佢嘅,[…] 咁我就會當係一個新嘅開始,就再去做另一樣嘢嘞。咁同我而家做嘅嘢一樣。點解我咁鍾意做 freelance,就係,我可以由零開始,做完嗰舊嘢之後,我可以突然間掉走咗佢,我再去 reborn,再諗另外一樣嘢,而同之前嗰啲嘢係完全可以唔同,無『啦能』嘅。其實我係 enjoy 呢一種感覺囉。咁所以我係無數過…」

六、 着衫

「其實我真係會買啲五蚊、十蚊嘅衫… 其實我覺得衫無話好定唔好,係你襯囉… 襯得好定唔好。[…] 係成個 totally 嗰個感覺,係最重要。」

七、 似男人

「其實我係好男人㗎我做嘢。咁通常啲男人就會覺得我好女仔嘅── 即係掂一掂都散開,或者係搬唔到重嘢嗰啲,咁但係我係 [強調] 勁大力㗎!」

八、中學 Drama Club*

「由 Form 1 開始呢已經玩話劇,最初做演員啦。跟住發現,咦個 hall 個底嗰度呢,其實係 Drama Club 收藏寶物嘅地方嚟嘅。咁我成日都會走落去搵嗰啲怪嘢玩吓。做演員嗰時,已經落去搵啲道具呀,見到啲古怪嘅衫呀,又會着上身。[…] 我諗我 Form 2、Form 3 呢,已經開始發現自己其實喺表演嗰方面,係比較唔得㗎──太怕醜同埋驚畀人望住。咁開始就… 即係由細到大都有畫畫呀,做一啲關於美術嘅東西呢… 咁就諗:咦不如轉做幕後喇… Form 4 已經開始會幫啲演員襯吓啲衫呀咁。」

*岱羚畢業於鼓勵話劇活動的沙田蘇浙公學,其師兄師姐包括:朱栢謙、邵美君、黃呈欣等。

九、 輟學

「本身個[香港演藝學院舞台及服裝設計] 課程係五年㗎,但係我讀咗四年就出嚟做嘢喇,無讀到最尾嗰年。 […] 其實讀咗第二年之後就成日出嚟做嘢。但係唔係做緊服裝設計,或者佈景設計,係只不過出嚟做 ASM (執行舞台監督)[…] 可能由細到大都係 Drama Club 嘅一份子呢,好明確知道呢一個行業呢,每一個都係付出緊嘅,所以呢,當其時我係完全唔會介意做一啲跟場呀,或者買道具、整道具嘅嘢。我好開心我而家諗返都。」

十、成為黑目鳥劇團成員*

「本身我呢,係唔關事嘅,即係無一個名份嘅,但係無啦啦,場刊嗰度呢, [成員之一梁子]峰做嗰個排版嘅時候呢,就出現咗一個錯誤,就係,唔小心 copy and paste 咗我係黑目鳥成員之一。咁就… [] 咁就瀨咗嘢喇。咁然後都有問我:『咁點呀,駛唔駛刪佢呀?』咁當其時我覺得:『嗄一齊玩囉!』咁變咗其中一份子嘞。」

*黑目鳥劇團 (Black Bird Theatre) 成立於二零零九年,是本地非牟利年輕專業劇團。劇團成員包括: 鄧世昌、柯嘉琪、梁子峰、余岱羚和郭翠怡。

first published on muse blog on 13 april 2013

http://www.musemag.hk/textpattern/winniechau/72/10-stupid-questions-for-2nd-wise-interviewee

the unspoken

© 2020 by winnie chau