Search By Tags

10 Stupid Questions (5th wise interviewee) 作詞人 岑偉宗

二、你覺得人應唔應該整容? 三、如果有 cold call 打嚟,你點樣同佢對答㗎?

四、你想唔想像到一個人會愛上一隻動物呀?

我對岑偉宗嘅認識係由個「尐」字開始。三年前,去睇劇場空間嘅音樂劇《點點隔世情》(Sunday in the Park with George),忽然見到字幕出現呢個從未見過嘅字。有懷疑過係 technical 問題,出錯字,之後睇場刊先知道「尐」係「啲」字嘅正寫。

兩年後幫演戲家族嘅音樂劇《一屋寶貝》(最終回) 場刊做訪問,先算真正認識岑偉宗。發覺原來佢嘅性格同佢寫嘅歌詞差唔多,有唔同嘅原素,雅、妙、趣、俗、鄙都有,而妙同趣佔大部份。慢慢我同佢嘅書面溝通都無咁拘謹,已經唔會再刻意用正字。

反而同佢性格有差別嘅,係佢嘅情歌。雖然佢同太太好恩愛,但係佢喺現實嘅愛情觀好理智。佢「拒絕同埋鄙視苦戀」,重話「真係唔好虐待自己呀做人,好無謂」。從佢答呢十題問題嘅答案,更加令我覺得佢係一個實際嘅人,但係佢嘅實際又有種善意喺裡面。而佢嘅率真,其實有時都幾 amusing。

一、 如果畀你揀,下一世你會做男人定女人?

[靜默一秒,然後輕聲叫] 嘩!其實我就好鍾意女人,但係我係鍾意旁觀女人,所以我覺得我都係做男人。係呀,男人。[…] 做女人有咩好處呢?女人靚囉,但係靚嘅嘢留返我去睇吖嘛 [倆笑]。咁我唔需要係靚嗰個,我係睇靚嗰個。係呀,我諗我都係鍾意做男人。

二、 你覺得人應唔應該整容?

唔應該,真係唔應該。因為… 因為嗰啲嘢係外加落去㗎嘛。咁 er 就算你幾好手工都好啦,到某個日子,你就會… 會變㗎嘛嗰啲嘢,即係嗰啲物質會變㗎嘛一定。咁可能會甩㗎啦。咁或者黐落去,你會甩咗… 譬如你裝修都係㗎,[Winnie 笑,然後 Chris也忍不住笑] 你油油,過一排,嗰啲油會撲㗎嘛… 你防水都係,防水防到幾廿年之後,咁佢都會有啲痕㗎嘛。 咁有痕嘅時候你再補,補嘅時候又兩「浸」色㗎喇,咁就唔夾㗎嘛。咁所以... 裝修已經係咁嘅時候,何況你擺落去人嘅身體度呢?但係你而家純粹從 technical 嘅角度去睇喎… 係呀,咁因為你一甩就唔靚㗎嘛。[倆笑] […] 咁同你整容嘅原意咪相反囉 […] (問到 Chris 有關道德、概念上的問題,他說了一兩分鐘) […] 即係我娶呢個人返嚟,咁我覺得佢特別醜樣,咁可唔可以[叫佢]整容,我又覺得… 個老公好無聊囉… 佢嘅要求會好無聊。如果個老婆順應個老公嘅要求,佢重無聊呀。因為老實講,你愛佢,你愛啲咩啫?你梗係愛佢個人啦,你愛佢個人係成件事㗎嘛,成個氣質㗎嘛。包括性格㗎嘛,包括內心㗎嘛 […] 即係除非佢被人淋咗漒水,佢要整容。呢個就變咗係整形… 矯形手術,咁就兩件事。

三、如果有 cold call 打嚟,你點樣同佢對答㗎?

嘩,如果我得閒呢,我就會同佢傾吓偈嘅,咁 er 如果我好唔得閒呢,我就會唔應佢囉。[…] cold call 都係好辛苦嘅行業,通常佢哋係,譬如你接到電話呢,佢都希望維持到一段嘅時間嘅對話,好似佢先[算完成] 一個工作㗎嘛。咁所以你又唔好咁快收佢線,即係都可能 hold 返十零廿秒,反正一分鐘之內都唔會計你[多一分鐘] 電話收費,所以盡量喺嗰一分鐘裡面幫吓人啦。

我試過有一次呢,有[間]銀行打電話嚟,就同我講貸款 […] 跟住我好認真咁同佢講,我好認真嘅,同埋我好細聲,因為喺嗰個位置好應聲嘅。我話 [Chris 認真地] :「我而家大緊便呀。」[倆笑] 因為佢之前好認真咁同我講 […] 佢好似嚇親咁呢,即刻:「唔好意思,唔好意思…」即刻收線囉。[…] 但係你係咪真係做緊嗰件事?其實係真嘅。[大笑]

四、你想唔想像到一個人會愛上一隻動物呀?

《山羊》*呀嘛?我係唔得㗎,想像唔到㗎。即係好似嗰日我睇完《山羊》個戲, […] 個男主角話佢愛上隻山羊喎,佢覺得隻山羊愛佢喎,所以佢同嗰隻山羊做愛,佢唔係搞隻山羊喎。係咪得㗎?[我意思係]世上有無這回事?我唔係指有無人會愛上隻山羊,同埋隻山羊會愛佢,而係話,事實上,世界,呢一個天地之中,會唔會真係有一隻動物,會愛一個人,而[嗰個]人係可以好肯定咁話畀你聽[嗰隻]動物係愛佢嘅。即係你一定要喺咁嘅基礎裡面,你先可以愛上。唔係我監硬話你愛我,然之後我搞你,咁其實等於一個強暴咋嘛。但係其實,嚴格嚟講,就算人同人,就算對方話愛你,佢口講咋嘛,或者佢做咗啲嘢好似係愛,但係… [突然] 嗱!兩件事,起碼… 假如我而家問:「Winnie Chau ,你係咪愛我?」咁你話係吖嘛,咁你話係,我當係㗎啦,咁你唔好話:「喂我逼於無奈愛咋喎,我根本就唔愛 […] 」咁你即係玩我啫,如果你咁樣反口。起碼你用人類互相明白嘅語言,或者係其他人都可以證實嘅語言,身體語言都好啦,你係說明咗你愛先啦。[…] 山羊係咪真係講到畀你聽佢愛你先?即係佢… 我證明唔到吖嘛。證明唔到嘅時候,個男主角又話係喎。[…] 但係,我又信可以非語言… 佢話係「感通」[之類嘅字] 吖嘛。係呀,你講囉,「感通」囉,咁邊個證明嗰樣嘢係咁。係嘅,或者我又覺得唔需要同人證明。係呀,咁所以唔需要同人證明嘅時候,你就搞隻山羊算囉,你唔好話畀人聽。你話畀人聽,即係攞嚟搞啫。(之後五分鐘,Chris 繼續分享對這問題的見解)

* 《The Goat, or Who Is Sylvia?》,美國劇作家 Edward Albee 作品,以人獸戀為題。

五、有無一個你好鍾意嘅廣東話口語?

我好鍾意一句:「有乜依郁揸住碌竹」。[倆笑] 點解?有乜依郁,即係有乜嘢… in case [of] any accidents。英文係「in case」咁嘅意思吖嘛。有乜依郁,即係 in case 有乜問題出現,咁就揸住碌竹呢,有碌竹喺度扶住。咁即係有啲揸拿啦,有啲… 幫手啦、有啲扶助啦,咁就唔駛驚,最緊要淡定。所以有乜依郁揸住碌竹,萬事唔駛驚,無有怕咁解。

六、有無一個中文字,或者詞,你覺得應該廢除呀?

[…] 字就唔駛廢除嘅,我反而覺得個用法係可以廢除。譬如話,[啲人]成日好鍾意講「乜乜性」呀:「呢個係暫時性嘅啫」、「呢個係永久性嘅」。成日呢,香港身份證呢提醒你,「香港永久性居民身份證」── 呢個「性」字係多餘嘅。咁你「永久居民」都得嘅啫,點解一定係要「性」呢? 點解係一定要「性居民」呢?即係居民一定係要有性嘅?[如果唔係就]唔係「永久居民」,咁嗰啲無性嗰啲咪好慘囉。

[…] 我最唔鍾意嗰句:「一次性收費」。[…] 咁你話「逐次收費」咪得囉。「一次性服務」先抵死呀嘛,咁… 有乜服務唔係一次嘅呢?

[…] 所以如果你話要廢除呢,就廢除「一次性」裡面嗰個「性」,「永久性」裡面嗰個「性」,但係唔好廢除呢個「性」字。因為呢個世界重有好多「性」係需要 [用到] 呢個「性」嘅。

七、 有無一條問題你好怕畀人問㗎?

我好唔鍾意人哋問係… 以前我比較憎嘅一個問題係,我以前搞話劇,啲人成日問有無飛送。我就好憎嘅呢個問題。即係我覺得係好… 唔尊重。即係點解你要咁貪心呢做人,開口埋口都問人有無飛送。你係咪一個好貪心嘅人,第一件事。第二就係,咁你係咪當我啲嘢唔值錢?所以先問有無[得]飛送。所以我覺得好侮辱㗎其實。[…] 而家我就… 問啲[有關]錢嘅嘢,我就唔鍾意。點解呀?錢唔係個價值呀其實,錢只係價格咋嘛。譬如問你… 一個月搵幾多錢呀,寫首歌幾多錢呀,即係呢啲呢。[…] 人生睇價值㗎嘛,唔係睇價格㗎嘛,係咪?況且你知我搵得多,咁又點呢?我又唔會分啲畀你。你知我搵得少,咁又點呢?[] 你又唔會分啲畀我,係咪?

八、你撩女仔嘅 chat-up line 係乜?

[] 嗱第一件事,我就唔精於撩女仔嘅。所以基本上,chat-up line 係… 嘩真係… 好依稀呀個印象。未必係你自己真實經歷,或者係你要作詞,個 situation 要你諗呢樣嘢。我諗吓先,我諗吓先,因為我通常虛構出嚟一定唔成功。點解?喺真實生活裡面 practise 一定唔成功。即係無理由話 [以搭訕語氣]:「點呀,Winnie」。走㗎嘛即刻,[你] 會走㗎嘛,你唔會坐喺度同我傾㗎嘛。真係無乜喎,死喇我完全無呢個回憶喺裡面。[…] 通常:「喂你啲嘢咁靚嘅?」。係呀,好似都有講過呢啲。「喺邊度買㗎?」。嗱通常[問] 「喺邊度買㗎?」,一係就當你傻㗎囉,一係就講完就無下一句。即係:「萬寧」,講完。 [] 咁好傻㗎呢句。唔通話:「你下次帶我去買」咩。

九、揀一個政治人物,你會衷心願意幫佢揼骨。

嘩哈哈!我一定唔會揀男性政治人物。實在太唔舒服喇對我嚟講。同埋男性做得政治人物都係佬嚟嘅。[…] 但係啲女性政治人物,真係又無乜幾多個會令你會願意同佢揼骨按摩喎… [你嘅意思]即係佢工作得好辛苦,同佢鬆弛吓?係呀,可能剩係幫佢捏膊頭嘅啫。[…] 即係唔會同佢做熱油 spa 嗰啲。[]

政治人物瞬間千變萬化,今日我欣賞佢,聽日佢可能就已經變到另外一個好可憎嘅人。所以我呢一刻想按摩嘅,可能同佢按完摩之後,跟住佢就會做啲… 禍國殃民嘅嘢。哎吔,我而家呢一刻真係無呀。[…] 我諗昂山素姬啦。我頭先個腦一路諗香港有咩政治人物。其實我諗我可以同昂山素姬按。因為,佢軟禁咗咁多年,真係唔容易㗎呢件事。昂山素姬,係得嘅,我可以同昂山素姬按摩,call 佢吖!

十、你最想問你自己嘅一個問題── 可以係自己答唔到,或者唔知道點答嘅問題。

我成日都問自己:我死嗰刻係點嘅呢?

即係如果我[知道]下一分鐘死,究竟嗰段時間係點樣過呢?我嘅感受會係點嘅呢?我想像唔到。有陣時我坐喺度想像。[…] 因為我好鍾意人生,好鍾意生存,我覺得人生好可愛。即係我啲朋友又好可愛。[…] 老婆又好可愛啦。所以,對耐啲呀大佬。

成日都喺度好悲觀咁樣諗,但係永遠無答案囉。咁可能咁都好嘅,即係你永遠無答案呢,咁你咪好好地咁活落去囉。都好嘅… 如果我知道答案嘅時候,大鑊呀,我諗重驚呀。我諗唔係嗰一分鐘呀,係我嚟緊嗰十年二十年,我都會活喺一個唔知咩嘅狀態之下。

唔止十句,岑偉宗喺《一屋寶貝》同《四川好人》,令我印象深刻嘅歌詞

一、「話你知,若愛得深先見到/但我知,其實你經已做到」 。 《新鬼速成》

二、「世事無得/一次搞廉*」 《新鬼速成》 *「廉」係「掂」嘅正字

三、 「當渴望能被抱擁卻未能被抱/當渴望能受到鼓舞問誰辦到/當我淚流又試得我自己腳步」《如果身處天上》

四、 「掌紋交纏/就似將世界盡頭拉長伸延/讓我相信有部前傳因緣/今生不過未發現」《紅地氈》

五、「未了的結局太吸引」《未了的結局》

六、「無憾亦算喜/不應該避忌/遺願是我要求你/明日定要將往昔再玩味/笑到下世紀」《永別又如何》

七、「雲中三仙走足三千天/卻見到世間太偽善」《四川好人》

八、「呢個,都幾老實夾真心/等等,有岔錯唯你是問/觀察,姑且當住佢真心/信住佢,面前係個好心人」《四川好人》

九、「情人是寄託/或施與/或掛念/到相處/像揭書」《情若兒戲》

十、「人善人掛念/如若難再相遇/記憶更加相連」《回憶太多》

first published on muse blog on 11 jun 2013

http://www.musemag.hk/textpattern/winniechau/82/10-stupid-questions-for-chris-shum-5th-wise-interviewee

the unspoken

© 2020 by winnie chau