Search By Tags

10 Stupid Questions (9th wise interviewee) 劇作家 莊梅岩

一、你發過最大脾氣嘅一次係點㗎?

四、可唔可以形容吓你嘅初吻?

八、你覺得你自己最性感嘅時候係幾時呀?

and... 十個有關編劇嘅問題

好嘅劇作家應該唔識講大話;好嘅劇作家只會講好真嘅真話。

至少喺佢嘅作品裡面。

莊梅岩喺現實都會講好真嘅真話。

我對佢印象深,因為佢曾經講咗啲嘢,再一次證實呢個世界真係好似我咁諗:現實發生嘅事係奇妙過戲劇故事。

因為要寫《留守太平間》,莊梅岩要做 research,搵有關無國界醫生嘅資料。透過朋友介紹,去訪問一個曾經做過無國界醫生嘅醫生,朋友仲講笑話想撮合佢哋。莊梅岩不以為意,因為其實佢身邊都有好多醫生律師朋友。

但係,喺六個鐘嘅訪問,開始唔夠半個鐘,莊梅岩「已經深深愛上佢」。

莊梅岩就係咁認識佢嘅丈夫。

呢件事發生喺一個劇作家身上,好似更有說服力。

即使現實發生嘅事唔係想像咁好,我哋仍然可以去相信,嗰啲我哋唔知會發生嘅事。

一、你發過最大脾氣嘅一次係點㗎?

吓!嗰啲都係同老公呀… er 嗰啲㗎喎。[…] 我記得有一次 […] 我唔記得咗事件係咩,但係我記得我喺車上面怒叫呀。因為呢我個人係呢,嗰種呢,一路都好冷靜好冷靜好冷靜,愛同埋恨我都係咁,一路都好冷靜好冷靜好冷靜。如果你一觸及道我底線呢,我就「砰」一聲出嚟。我記得嗰次… 我真係唔記得係咩事喇。因為我哋都有幾次類似呢啲事。咁呢我想講呢,做咗媽媽之後呢,你個腦裡面係有好多 list:今日呢,就要做啲乜嘢、我要幫佢執好啲乜嘢、跟住呢,我自己嘅工作就係點樣、我老公又叫我買啲乜嘢、我阿爸我媽又要... 每一日就係咁樣過,我覺得好攰。咁可能嗰次呢就係類似… 佢話唔出現,但係佢後尾又出現,然之後搞亂咗我嘅 planning,然之後我哋 on the way 睇緊一齣戲,佢就破壞哂我心情,然之後我就 [語氣憤怒] 好忟!

咁我老公又係咩人呢,佢好勁㗎。佢就係嗰種呢,你點樣做大龍鳳呢,[撟着手模仿丈夫] 我就係唔 Q 理你。即係嗰種人嚟嘅。咁呢,我見到佢唔理我,我就仲癲。咁我就叫:「點解會咁樣呀???我哋人生完喇!!!」[像在說 aside,低聲] 其實呢句說話呢,我生咗仔之後,講咗好多次喇。

[…] 吖!我記得喇,好似唔知咩母親節,我好乖㗎嘛,買咗四個蛋糕,一個我畀我阿爸阿媽、一個畀我婆婆、一個畀我奶奶、一個畀我奶奶個阿媽 […] 總知就,嗰日就做咗好多嘢,總知撻一撻, 我就「礴」一聲,就係咁樣嘞。我而家成日都係咁。而家都有㗎?其實我不嬲都係呢一種人,但係而家更加多嘢做,所以就更加癲嘞。

二、你信唔信直覺?

[立即] 我好信直覺啦!我人生所有嘅事都係憑直覺做嘅 [] 我覺得幾乎。譬如揀咩題材去寫呀[…] 鍾意一個人,唔鍾意一個人啦──其實而家基本上,去識一個朋友好快我就覺得我同佢 work 唔 work out 到。 […]

三、你有無寫日記嘅習慣?

[直截了當而且帶點不俏] 無!唔記得哂喇所以好多嘢都。無!完全無!係唔想寫,定唔需要寫?懶寫囉。我都唔鍾意寫嘢嘅,咁樣講好奇怪。即係我唔鍾意寫劇本以外嘅嘢。我連文章都唔鍾意寫㗎其實。即係有陣時有少少[文字上嘅]分享都會嘅。但係,日記係一樣我覺得都幾… 即係你要好有 mood, 好有 feel 坐低咁樣[寫]。我覺得 Facebook 而家幾好吖,有陣時我睇返覺得係一種日記嚟。即係如果你從嗰個角度諗,都有嘅。

四、可唔可以形容吓你嘅初吻?

初吻… [一秒後] 呀!喺一個北角嘅碼頭 [放聲大笑] 。喺北角嘅碼頭,嗰個我初戀情人,我諗之前嗰幾日一路都… 最好笑呢係,其實嗰次唔係我哋兩個約出去嘅。我哋兩個呢,共同有一個男性嘅朋友。[…] 唔知中五、中六嗰啲,我唔記得咗中幾喇。[…] 咁個男仔[朋友]呢,好細個咋嘛我哋嗰陣時,但係佢扮… 扮嘢㗎嘛,一失戀就飲酒飲酒飲酒。我哋呢啲都係可以晚歸嘅人吖嘛。我就應該同嗰個男仔有啲 feel 㗎喇,嗰排都已經。咁一齊出嚟陪嗰個男仔。咁整整吓,佢喺前面發癲,我哋就坐喺後面睇… 咁就係一個佢瞓着咗,我挨喺佢[度]嗰個情況之下,咁佢就錫咗我。咁我哋都唔錯,[Winnie 笑] 都幾浪漫。係錫面定錫嘴呀?死啦,係咪北角碼頭?總之係某個碼頭。Er,首先係面,跟住係嘴。[稍停] 愛情真係好好… 愛情真係好好…愛情真係一件好美好嘅事,即使到最後無一齊,我都覺得係好好。

五、你覺唔覺得呢,呢個世界上所發生嘅嘢,都係背後有個編劇㗎?

背後有個編劇… 我以前細個有咁樣諗過嘅。但係,而家我覺得,其實係撞出嚟嘅。唔、唔。我諗我係鍾意咁樣諗啫,未必係我相信係。我鍾意咁樣諗。如果唔係我解釋唔到點解有一啲好唔公平嘅事發生,又或者有啲小朋友要死亡。你有無宗教信仰?無。但係以前我會傾向於[…] 我唔信有一個上帝,又或者耶穌,即係宗教背後嗰個 figure。但係,我信有一個造物者嘅。但係而家我相對嚟講無咁信。[…] 輪迴都解釋唔到,對於我嚟講。跟住呢個問題有啲敏感嘅[] ,就係-

我第一次失身幾時?[]

[] 唔係呀、唔係呀。

六、你最鍾意 TVB 邊個劇集?

哦,傻啦,唔敏感。最鍾意 TVB 邊個劇集?我喺度諗緊我有無追過嘅階段呀。如果你咁樣問呢,我就會話《天師執位》。《天師執位》你有無聽過呀? 我有聽過,但係無睇過。翁美玲做,[強調] 好好睇,真係好好睇呀-[沉醉地拉長尾音]。我連嗰首歌我都識唱!譚詠麟… [] 「曾經說出,今生不愛你」嘩,[感嘆地「唧 」一聲] 一響起嗰首歌呢,唔知點解我個心情就… 好難過。好好睇,真係好好睇!因為我細個我好鍾意翁美玲,所以我估都係都[因為]係翁美玲嘅戲。[突然] 唏!但係呢,除咗最鍾意,[《天師執位》]係最鍾意,但係另外有一個系列,我都好鍾意,就係周星馳嘅戲。我超級鍾意 [拉長「超 」字] 。 我係超級鍾意睇周星馳以前啲戲!咁有一齣呢,叫做《他來自江湖》,極好睇㗎又係 [強調「極 」字] 。好好睇,好開心。我無呢個[時]間咋,如果唔係我買返返嚟睇再睇,因為真係好好睇。反而《天師執位》就未必喇。《天師執位》我無再睇過,係個印象好好。譬如《他來自江湖》呢,重[播]再重[播] ,即係好多周星馳以前嘅戲,重睇再重睇,你都覺得好好笑。係呀。呢幾年真係無,我都無睇。

七、 你覺得點解咁多香港人鍾意喺出街食嘢嘅時候影低啲食物?

[有點苦惱] 點解呀?「你覺得」嘅啫-我知,我知。

因為呢,我覺得香港人又唔係一啲好... 其實當然而家有咗 Facebook 係好啲,但係佢哋唔係嗰種... 願意打開自己嘅心呀,因為鬼佬係好鍾意咁樣㗎嘛,咩都會講出嚟,咩都願意講吖嘛。[香港人]既唔係咁願意公開自己好多私人嘅嘢,咁食物係一啲好 neutral 嘅嘢咋嘛──我覺得呢樣嘢靚唔靚,我覺得呢樣嘢好唔好食、好唔好睇。即係呢啲嘢唔影響佢嘅聲譽吖嘛。即係一方面係咁樣,呢個唔係一件好 personal 嘅事,而另外一樣嘢,可能佢哋嘅生活亦都真係無咩好多嘅驚喜呀,令到佢哋覺得值得記載,除咗嗰啲食物。我覺得係咁囉。

八、你覺得你自己最性感嘅時候係幾時呀?

你講緊一日廿四小時,定係我成個人生呀?Er,未必係一刻嘅,例如話你做某個動作係最性感嘅-[打斷] 我一定覺得我 [] 我而家嘅狀態我諗唔到咩時候係性感呀。但係我諗我曾經有一段時間係唔錯㗎。就係… 可能係啱啱讀演藝學院嗰一、兩年啦,我覺得係唔錯㗎。因為嗰陣時年青啲啦,嗰陣時係第一段時間自己係會思考自己究竟個性格係點、人生係點,個人係,好知性㗎。我覺得知性,就… 就性感㗎。知性係好性感㗎。女性[嚟講],知性係好性感。而嗰個階段嘅我呢,係知性同埋感情都係好 balance 㗎。即係好感性,但係又好知性。所以我覺得嗰陣時最性感。

[…] 而家多咗一種嘢,就係個人會好懵呀。好難解釋嗰種好懵呀、好糊塗呀。因為你可能好多嘢要兼顧呢,就會甩甩漏漏呀,好蠢囉。成日都覺得自己好蠢,就無咁性感㗎喇。有太多生活瑣事你要去處理。[讀演藝學院]嗰陣時[我]完全唔駛處理生活瑣事。所以梗係性感㗎。

所以我好尊重女性㗎。尤其嗰啲有細路[倆笑] 。因為佢放棄咗佢嘅性感。

九、如果你個囝囝大個咗之後,話想做編劇,你嘅反應會係點呀?

[立即] 其實我覺得無問題,佢想做咩都得㗎喎。只不過佢話做編劇── 一樣我了解嘅嘢,我就可以話畀佢聽,其實最痛苦嘅,唔係賺唔賺到錢嘅問題。[強調] 亦都唔係懷才不遇喎。好多人覺得懷才不遇好痛苦,我從來都唔覺得懷才不遇好痛苦。因為懷才不遇呢,係好可貴㗎,就係你 [此時 cafe 發出打破杯碟的聲音] 嘩!好大聲呀,打爛咗好大舊嘢… [往聲源方向看,替打破東西的員工擔心,幾秒後] 因為呢,懷才不遇唔痛苦嘅地方係,你起碼你覺得自己有才。其實係好可貴。我覺得最難過,就係,好似薩里埃利 (Antonio Salieri),就係一種你覺得人哋比你做得比你好好多,而你係見到人哋嗰種好,你係追唔到㗎。

我覺得如果我個仔想做呢一行,佢要麼就好 enjoy 自己嘅作品,咁就好幸福喇。[…]就算佢覺得自己未夠好,但係佢覺得自己有能力繼續去做,咁我就覺得好。

但係我會話畀佢聽係有咁嘅情況囉。

十、你最想問你自己嘅一個問題── 可以係自己答唔到,或者唔知道點答嘅問題。

[五秒後] 我諗我而家呢個階段最想問自己究竟係[咪] enjoy 家庭。因為我啱啱早兩日先諗,究竟我係咪真係 enjoy 家庭、我係咪適合結婚,哈,而家先嚟問呢個問題!係咪適合生小朋友。咁樣。

然之後呢,我都係有一個答案嘅。但係呢個答案係比較複雜:我覺得,而家我發覺,我其實原來只係熱衷於做一件事── 我只係熱衷於寫劇本。其他事情我表現得熱衷嗰啲呢,都係裝扮出嚟㗎咋。[提高聲線] 但係呢,我咁樣講呢,又唔代表我唔愛我嘅家庭,或者我唔愛我身邊嘅人。只不過就係,你最熱衷,只係做嗰樣嘢。其他嗰啲嘢呢好似係,[稍停] 係只係令到你更加鍾意而家做緊呢樣嘢囉。

譬如我喺夫婦之間、父女之間── 即係我爸爸同我、我同我個仔母子之間 、我同朋友之間、我同同事之間,嗰種愛呢,其實都會… 豐富緊我所熱衷做嘅嘢。所以,其實,講到最底藴嗰層呢,唔係有好大嘅衝突。

但係,其他[嘅]嘢,因為你牽涉到其他人,同創作唔同。創作,嗰樣嘢係我㗎嘛。我想點對待佢都得。其實周遭所有嘅嘢,都唔係一個咁單向嘅關係。你要顧及別人嘅感受,你要顧及對方,咁所以,我覺得愛創作係一樣好自私嘅嘢。好熱衷於只係做創作。其實係一樣好自私嘅嘢。不過我嘅結論係:其實我係好想自私囉。[]

十個有關編劇嘅問題

一、你為咗 research,可以去到幾盡?

我好想去做雞㗎其實。係呀? 不過... [Winnie 笑,不知道是笑莊梅岩所說的,還是她 matter-of-factly 的語氣] 不過,我只係去到面懵懵咁樣,周圍去問人:「呀你可唔可以同我做個 research 呀?」

[…] 但係我細個嗰時無咁嚴重嘅,我而家係越嚟越癡迷嘅,對於想知道一啲嘢,或者好想代入嗰啲嘢。譬如我以前去做 cafe,我就係寫[《砵蘭街的 Venezia Cafe》] ,我就會去做 cafe。咁但係呢啲其實唔係好大損失咋嘛。你仲賺都每日兩百蚊添。

但係,做… 舞女就唔同吖嘛。做舞女你真係… 你真係有嗰個道德上面嘅問題呀。Er,有一啲危險。[…] 以前我覺得諗都唔駛諗囉。但係而家呢,我將道德嗰… 條線呢,係睇得仲放開啲。所以如果我而家無結婚,無生小朋友,喺其他人唔知嘅情況之下,又或者我唔駛上床嘅情況之下,我就會好想做吓嗰啲[…]「金魚」呀俗稱。[接着解釋「金魚」和「木魚」的分別]

咁我覺得做「金魚」作為體驗都好好喎。選港姐我又唔得嘞。當然啦, 做「金魚」我都未必得啦 [大笑]。但係我意思係話,即係好多嘢我都好想知道呀。我最夢想呢,吖如果有一渣機構,我每個月去幫佢做一段時間,佢只係畀返好少嘅糧我,我可以生活,咁就好喇。

二、你係咪用原稿紙寫劇本㗎?

係呀,我唔識打字㗎嘛。你唔識打字㗎?我而家速成可以用嚟改稿囉。但係打都係太慢喇。改稿可以,因為你唔駛急住記錄自己某啲嘢嘛。即係如果有得選擇,你係會用電腦嘅,唔用原稿紙?其實都係。咁樣起碼我少咗一重工夫,就係翳人哋幫我打。或者畀錢人幫我打囉。而我每一次都係好掹㗎交劇本。我以前有一個打字小姐,嗰個打字小姐其實係我其中一個好朋友。咁我就,每一次,聽日要圍讀… 佢好好呀,佢知道我嘅性格,又容忍我嘅性格。佢就會攞埋部電腦上嚟我屋企,通宵咁樣幫我打,或者佢自己喺自己屋企,我 fax 咗畀佢,通宵咁樣打。但係後來佢戀愛喇,咁我就… 又或者佢工作係忙咗啦,就無得好似以前咁樣。我都唔知點算喇。

其實我有個問題想問你,你交稿之前會唔會畀人睇,但係其實你答咗我,你一定要畀幫你打字嗰個人- 但係我唔會問佢點睇㗎 [輕笑] 。除咗佢之外,你會唔會,如果有時間啦,畀一啲人睇呀?以前有,以前有一個固定嘅人呢,我係幾乎… 早期嘅劇本,幾乎佢永遠都係第一個睇。係咪好緊張係邊個呢?[緊接] 就係胡麗英嘞。哦。因為嗰陣時我又未拍拖,佢又未拍拖,佢成日嚟我屋企過夜,我哋成日 hang out,佢睇住我趕稿趕到仆街㗎。

[…] 其實我係好懶嘅人。好鍾意拖!咁呢,我就會話:「胡麗英,我瞓一陣先,你兩個鐘頭之後叫醒我。」[…] 兩個鐘頭之後,「喂,Candace 起身喇!」[胡麗英]形容我[嘅狀態],係:「得喇,我而家諗緊,我其實諗緊,我唔係唔起身寫。」但係佢就好憎我。

嗰陣時係咁,除此之外,無一個固定嘅人。

三、 你會點形容你同字嘅關係呀?

我同字嘅關係呀?[十秒後] 我覺得 er… 我覺得我都係會當佢係一種… 我覺得以前,我會當佢係一種工具。Er,後來我就會覺得… 字其實係好無用嘅。即係尤其係我聽完一首歌,或者睇完一個舞蹈,或者睇完一幅畫,我就會覺得點解我要用咁多嘅[字]去表達一啲嘢。但係人哋就,根本係一個動作已經勝過千言萬語。我以前會咁諗。

但係而家慢慢覺得… 覺得我嘅工作,或者我喜歡做嘅事,就係砌一大堆字去表達一啲嘢, 去分享一啲嘢嘅時候呢,我就會同佢… 即係我就會多少少尊重,但係又唔係好熱情咁樣囉。Partner 囉我諗。

四、有無一啲說話,你好想同你創造嘅其中一個角色講㗎?

[半秒後] 有![《聖荷西謀殺案》]入面嗰個 Sammy 啦我諗,就正如我[喺場刊]「編劇的話」入面講:即係我殺咗佢我唔係想… 因為佢係好好㗎,我覺得我殺咗我唔係想炫耀我哋作家有嘅… 生殺大權呀。或者唔係想 impress 觀眾囉。我想解釋畀佢聽,我唔係想咁樣。只不過我覺得佢嘅死,真係,係會為呢個社會,或者為好多人嘅人生帶嚟一啲提問,或者契機,所以我先要佢死。

五、如果你所創作嘅角色,某一個係存在喺呢個世界上面,你覺得邊一個存在會令到個世界美麗啲呢?

揀一個呀剩係可以?如果你諗到多一個都可以。因為好多,其實所有好嘅人我都覺得好好。吖諗吓邊個好啲呢?[思索着, 半晌後] 吖唔知點解我會諗起,一個好微好微嘅角色,但係我諗嗰個人係存在喺呢個世界上面。因為我好多角色都係有一啲原型㗎嘛。

咁我記得嗰陣時寫[《砵蘭街的 Venezia Cafe》],我去做 cafe 嗰陣時,真係有個古惑仔喺入面,[…] 佢真係好得意㗎!佢好似童話世界出嚟㗎我覺得,佢係唔似我哋諗嘅古惑仔,但係真係坐過監呀。咁佢又話畀我聽佢嗰陣時點解坐監,因為佢女朋友畀人強姦,佢喺美國坐監,[…]然之後佢去… 唔知佢係殺死嗰個人吖,定打死嗰個人吖… 即係嗰種。但係佢女朋友叫佢唔好話畀人知,[…]佢應承咗佢女朋友唔話畀人知。[…] 咁所以後來佢坐監都無人知道佢係因為咁樣嘅事而坐監。佢所有嘅屋企人覺得都好奇怪:點解你本來好地地,[…]點解你會變壞咗?唔係坐咗好耐,坐咗四年咋,咁所以應該唔係殺死人,打人㗎咋。

[…] 咁佢嗰陣時知道我去美國呢,佢就問我,可唔可以幫[佢]探吓[佢]嘅爸爸媽媽,因為[佢]唔想再返去。[…]因為佢坐完監出嚟,個個人對佢都好奇怪,佢覺得佢已經唔再屬於呢個單純嘅世界。[…]我都見過佢爸爸媽媽,後來佢爸爸媽媽死之前,佢都無再見過佢哋。所以係一個好 sad 嘅一個故仔嚟嘅。

但係我同佢接觸嘅過程裡面呢,我覺得佢係一個好人。 但係 ,佢係一個「混混」囉,即係佢唔係做一個正經嘅生意。[…]但係佢係一個好好嘅人。

[…] 其實呢個社會係好多呢一啲人我相信,被人誤會咗。[…] 如果連我哋心目中,以為佢壞嘅壞人,其實都係咁好嘅,就會好美好囉呢個世界。

[…] 有啲人佢係喺我哋見唔到嘅地方喺度幫人。[佢]男人老狗大大隻隻咁樣呢,見到[一隻唐狗]生咗一蘿狗[仔]呢, 佢會影落嚟,post 喺微博嗰度,問有無人收養。你明唔明呀?好美好呀,美好到好似童話咁樣㗎有陣時。我希望呢啲人可以生存喺呢個社會。

六、咁如果相反呢,即係有無角色,你覺得佢最好唔好喺呢個世界出現?

有。後來可能好多,我諗吓先。[…] 我諗我未至於[去到]憎[嗰個角色]。譬如《野豬》入面嗰個許文… 許文山嘅點解叫?唔係喎,叫咩名呢? 阮文山呀。邊個做㗎嗰個角色?廖啟智做嗰個角色。因為呢,呢一種人係最可怕㗎,某程度。但係呢, 譬如喺戲裡面,佢嗰個角色呢,當然從人性嘅角度去睇,佢好多嘢嘅轉變你都理解佢嘅,但係點解我會特登攞呢個人出嚟講,就係,我最可怕就係偽善嘅人。即係你好就好,壞就壞。你唔好… 企喺道德高地,但係其實你係做緊壞事。我諗我最唔鍾意呢種人。

七、你覺唔覺得寫作,其實有時好神奇,因為呢,你有時講唔到啲嘢喺邊度嚟,但係又係用你隻手寫出嚟?

係呀!我成日都係有呢個感覺㗎。同埋我係一個好善忘嘅人嚟㗎。就係善忘到咩地步呢,譬如我去睇返我以前嘅作品呢,我係唔記得嗰個 flow 係點㗎。我係會畀年輕時候嘅自己 amaze 到自己㗎。我覺得:吖!係喎,係咁喎。

我覺得好奇妙㗎,所以我成日都形容,我寫劇本就一個「入 zone」嘅狀態。[…] 打機都有「入 zone」,你完全唔知道周圍發生緊啲咩事。你剩係喺嗰個世界裡面。咁我哋寫劇本都會㗎。所以,好多時候,過後我就唔記得。

八、咁你覺得你讀咗心理學,對你創作有無幫助?

有、有。但係你會唔會有一啲既定嘅諗法, [即係心理學]畀咗啲既定諗法你?會。所以呢,我而家其實倒返轉頭,成日叫自己唔好往嗰個方向諗㗎都會。

心理學裡面,有講好多,其實有啲潛意識啦,簡單啲嚟講係潛意識啦。即係,但係係有好多你抑壓住嘅情感、或者你抑壓住舊嘅傷口,或者因為人哋咁樣對你,所以你而家咁樣做。係你自己都解釋唔到,或者你自己根本唔知你係咁樣諗。呢樣嘢係好影響到我嘅創作嘅。

我會諗一個角色,我係諗佢意識嗰層,同埋潛意識嗰層。但係,我有陣時,又好怕自己成日都會咁樣諗,因為將啲事情複雜化咗。

而家咪多[咗]啲心理病嘅名稱,或者多啲人有呢樣嘢,或者好多講法啦,即係譬如話,例如你係一個都幾正常嘅人啦,無乜特別慾望嘅,但係就會有講法話你:你係抑壓住嘅。係。即係好似呢,心理學某程度上,硬係要話你一定係抑壓住一啲嘢。無錯!我唔知好定唔好,定話係咪真囉。我自己嘅界定呢,我亦都覺得而家太多 label 呀、labeling 呀。譬如強迫症,如果我只係「mee」吓手指,咁呢啲只不過係啲強迫嘅行為,呢啲係一啲習慣,一啲壞嘅習慣或者,但係佢未去到影響 daily functioning 吖嘛。我哋嗰個 abnormal 嗰個界定就係,你影唔影響到你嘅 daily function。但係而家啲人傾向於呢,嗰樣嘢都未去到影響你嘅 daily functioning,佢已經睇得太重,或者太咩… come on, relax!

譬如好似啲小朋友咁樣,佢有段時間梗係曳啲㗎喇,佢有段時間梗係了鼻屎㗎喇。你唔好將嗰樣嘢變成一個佢嘅病,或者覺得:「呀,一定要好認真咁對待。」因為呢,呢樣嘢係好… 包括你諗自己都係,好影響緊你嘅心理──你咁樣諗又再影響緊到你心理。譬如你同個小朋友講:「你唔好再成日了鼻屎。」可能令到佢更加意識:「我了鼻屎係唔啱。」嗰陣時就真係抑壓住喇。

而家啲人無咁 relax 囉我覺得,即係將一啲人哋嘅缺點呀,或者人哋啲缺陷,睇得太大,太醫學性囉。

九、你覺得編劇喺作品裡面,係咪唔係咁應該將自己嘅道德價值,好明確咁樣表達出嚟── 即係 open 咁畀佢哋去思考,會好啲?

我覺得係㗎。我覺得係,不過,我覺得好難做到嘅。所以我後來就唔諗呢個問題嘞。因為呢,你嘅作品一定係反映咗你嘅道德標準我覺得。[…] 即係有啲絕對嘅答案:殺人係唔啱。呢個真係好清晰。但係,真係有好多嘢都係灰色嘅地帶呢,我傾向唔講個答案,但係,你其實某程度,你一定見到我嘅傾向。

除非你將文字嗰個用量減到最少,無角色,無故事,文字減到最少,等等呢啲方法,你先可以將嗰樣嘢 disguise,或者比較睇唔到,如果唔係我都覺得好難。因為就算我喺個劇本裡面話畀你聽,殺人係啱嘅。咁樣未必等同我覺得殺人係啱。因為我入面,可能嗰個,只不過係個手法囉。或者嗰個係我 disguise 緊。咁但係... 所以唔好信編劇講嘅嘢。

我講完咁大堆嘢之後,我話畀你知:唔好信編劇講嘅嘢。[Winnie 笑]我講笑啫,我意思喺劇本裡面。

十、咁你覺得其實我哋係咪最好唔好知太多編劇嘅背景呀?

睇吓你站在乜嘢[角度]。你站在分析嘅角度,梗係知道編劇嘅背景好啦。但係呢,我覺得站在一個品嚐一個製作,我就覺得唔知會好啲。所以我呢,從來呢,去睇一個製作呢,我唔睇場刊㗎。因為,唔駛啦,我覺得我睇你舞台上面做嘅嘢咪得囉── 我先至真係可以「dep」到嗰個作品究竟係咩。

到到我再睇個場刊,然之後再去思考返個作品嘅時候,已經係,你引導我去點樣思考,咁我自己係鍾意做我自己嘅判斷先。當然啦,我唔係否定場刊。因為呢,場刊有陣時係會話到畀你[知]一啲你[睇演出嗰陣] miss 咗嘅嘢。但係,我覺得第一浸,最後好咩都唔好睇去睇演出。

first published on muse blog on 27 oct 2013

http://www.musemag.hk/textpattern/winniechau/96/10-stupid-questions-for-chong-mui-ngam-9th-wise-interviewee

the unspoken

© 2020 by winnie chau